Sex barna faðir, Thomas Weldon, sem býr í Babbacombe í Devon á Englandi segir að nágranni hans, sem hann segir vera „nágranna frá helvíti“ hafi sett upp aðvörunarkerfi, sem aðeins börn heyra í, á hús sitt. Þetta hafi orðið til þess að börnin þori ekki út. Nágranninn, sem er kennari, segist hafa sett kerfið upp vegna síendurtekinna skemmdarverka og ónæðis frá börnum.

Kerfið gefur frá sér hátt og óþægilegt hljóð sem aðeins börn og unglingar geta heyrt. Weldon segir að kerfinu sé beint að útidyrunum á heimili hans og hafi farið í gang að minnsta kosti þrisvar í viku í allt sumar. Þetta hafi valdið því að börnum hans líði eins og þau séu í fangelsi.

Nágranninn, Lesley Cooper, segir að hún hafi fengið heimild hjá bæjarráðinu og lögreglu til að setja kerfið upp vegna síendurtekinna skemmdarverka og áreitis sem hún hafi orðið fyrir frá fjölskyldu Weldon.

Weldon leigir húsið sem hann býr í ásamt börnum sínum og segir leigusali hans að Cooper hafi alltaf samið illa við nágranna sína. Þrír síðustu leigjendur hafi flutt vegna Cooper. Devon Live hefur eftir Cooper að fjölskyldan hafi viðstöðulaust áreitt hana og skemmt eignir hennar og því hafi hún sett kerfið upp. Hún sé margverðlaunaður kennari og að kerfið hafi aðeins farið í gang fjórum sinnum á síðustu þremur árum.