Í síðustu viku slösuðust alls níu vegfarendur í sex umferðarslysum á höfuðborgarsvæðinu. Þetta kemur fram í tilkynningu frá lögreglunni á á höfuðborgarsvæðinu.

Í byrjun síðustu viku var bifreið veitt eftirför um miðborgina beggja vegna Lækjargötu og síðan stöðvuð á Öldugötu eftir árekstur við tvær bifreiðar á leiðinni. Ökumaðurinn er grunaður um akstur undir áhrifum fíkniefna. Fernt var flutt á slysadeild.

Á miðvikudaginn var bíl svo ekið á húsvegg við Réttarháls eftir að ökumaðurinn hafði ætlað að leggja þar í stæði fatlaðra. Farþegi í bílnum var fluttur á slysadeild.

Lögreglan hvetur ökumenn til að fara varlega. „Sem fyrr er ástæða til að vekja athygli allra vegfaranda á mikilvægi þess að fara ávallt varlega í umferðinni. Það á ekki síst við um ökumenn – hvort sem um er að ræða bifreiða eða reiðhjóla,“ segir í tilkynningunni.