Fresta þurfti atkvæðagreiðslum á Alþingi í dag vegna fjarvista þingmanna
Birgitta Jónsdóttir, þingmaður Pírata, segir að hálfgert upplausnarástand ríki í þinginu og kominn sé tími á að senda þingmenn heim og boða formlega til kosninga.
Fresta hefur þurft atkvæðagreiðslum á Alþingi í dag vegna fjarvista þingmanna. Svandís Svavarsdóttir, þingmaður VG, sagði á Facebook-síðu sinni í dag að ekkert vit væri í öðru en að senda þingið heim strax og boða til kosninga. Þessu er Birgitta sammála.
Eyjan greindi frá því í dag að aðeins þrjú mál væru á dagskrá þingsins auk umræðna um störf þingsins. Þessi þrjú mál þurfti svo að fella út af dagskrá vegna fjarvista þingmanna en um var að ræða atkvæðagreiðslur.
„Allir þingmenn Pírata voru í þinghúsinu þegar við fengum sms frá forseta þingsins klukkan tvö í dag. Það er ljóst að það eru þingmenn meirihlutans sem voru ekki í húsi og ekki hefur gengið nægilega vel að smala þeim í hús til að geta greitt atkvæði um ríkisstjórnarmál. Upplifi reyndar bara algert upplausnarástand á þinginu. Það er nákvæmlega ekkert á dagskrá nema ný mál sem ráðherrar vilja koma í gegn þrátt fyrir að það sé ekki tími faglegar yfirferðar,“ segir Birgitta á Facebook-síðu sinni.
Hún bætir við:
„Tek undir með Svandísi að það er engin ástæða til að viðhalda þingfundum, tími kominn á að senda þingið heim og formlega boða kosningar. Held reyndar að það standi hnífur í búvörusamingunum og það sé ástæða þess að það sé verið að halda þykjustufundi. Annars er nóg að gera í þingnefndunum og alveg snallt að gefa bara tíma til að þær geti fundað,) en það má ekki ef þingfundur er í gangi.“