Æðsti stjórnsýsludómstóll Frakklands hefur úrskurðað að búrkíníbann á baðströndum Frakklands brjóti gegn grundvallaratriðum um frelsi einstaklingsins sem öllum þegnum á að vera tryggður.

Úrskurður stjórnsýsludómstólsins (f. Conseil d‘Etat) er sagður vera fordæmisgefandi, en áður hafði undirréttur komist að þeirri niðurstöðu að ekkert væri athugavert við bannið. Í úrskurði þriggja dómara við dómstólinn kemur fram að bannið brjóti meðal annars gegn réttindum fólks til athafna, trúfrelsis og einstaklingsfrelsis.

Málið má rekja til þeirrar ákvörðunar fjölmargra bæjaryfirvalda í Frakklandi að leggja blátt bann við ákveðnum klæðaburði á baðstöðum, svonefndum búrkíni-sundfötum. Var bannið talið nauðsynlegt til að tryggja allsherjarreglu í Frakklandi eftir hrinu hryðjuverkaárása í landinu, nú síðast á Bastilludaginn, þjóðhátíðardag Frakka þann 14. júlí síðastliðinn.

Málið hefur vakið mikla athygli og velt upp mikilvægum spurningum um frelsi einstaklingsins og réttindi. Í vikunni birtust myndir af lögreglumönnum beina þeim tilmælum til kvenna á baðstöðum að afklæðast búrkíní-sundfötum sem þær klæddust.