Sunna Elvira Þorkelsdóttir, sem slasaðist alvarlega á Spáni í janúar eftir fall af svölum á heimili sínu, segir að henni líði vel í dag og sjálfstraustið aukist með hverjum degi sem líður.
Sunna var útskrifuð af Grensás í vikunni og er nú flutt í íbúð ásamt dóttur sinni. Hún hefur verið í stífri endurhæfingu síðustu mánuði og segir að hún hafi gengið vel.
„Það má í raun segja að ég sé hætt að vera sjúklingur og orðin ég sjálf á nýjan leik,“ segir Sunna við Morgunblaðið í dag. Þar segir hún einnig að hún ætli að huga að því að fá sér vinnu í haust, en fyrir slysið starfaði hún sem lögfræðingur.
„Það opnaðist alveg nýr heimur fyrir manni við þetta slys. Ég fékk betri innsýn í heim fatlaðra og ég held að það geti verið vettvangur sem ég gæti starfað á þegar fram líða stundir,“ segir Sunna.
Í Morgunblaðinu í dag kemur fram að lögregla rannsaki enn hvort Sigurður Kristinsson, fyrrverandi eiginmaður hennar, hafi átt aðild að slysinu. Þá er hann einnig grunaður um aðild að skákmálinu svokallaða sem varðaði innflutning á miklu magni fíkniefna hingað til lands.
Í samtali við Morgunblaðið segir Sunna að hún hafi ekki réttarstöðu sakbornings í skákmálinu. Páll Kristjánsson, lögmaður Sunnu, sagðist þó ekki geta staðfest það. Það kæmi honum þó ekki á óvart ef svo væri.