Í síðustu viku stöðvaði lögreglan akstur Stewart Weldon, 40 ára, í Springfield í Massachusetts í Bandaríkjunum. Ástæðan var að afturljóst á bíl hans var bilað. En málið vatt hratt upp á sig og varð að sannkallaðri martröð en um leið var þetta lán í óláni.

Í bíl Weldon var slösuð kona sem sagði lögreglumönnum að Weldon hefði haldið henni fanginni í einn mánuð og hefði misþyrmt henni kynferðislega og á annan hátt. Weldon var því handtekinn grunaður um mannrán og ofbeldi gagnvart konunni.

Í framhaldi af handtökunni fór lögreglan heim til Weldon og gerði húsleit. Í húsinu og á lóð þess fann lögreglan lík þriggja kvenna. Það virðist því vera sem afskipti lögreglunnar af ökumanni vegna umferðarlagabrots hafi orðið til að raðmorðingi náðist. Raðmorðingi sem enginn vissi að væri til.

Nú hafa kennsl verið borin á líkin þrjú að sögn Boston Globe. Þau eru af konum á aldrinum 27 til 47 ára. Tvær þeirra eru frá Springfield en ein frá Ludlow.

Á mánudaginn var Weldon birt fyrsta ákæran vegna málsins en samkvæmt henni er hann ákærður fyrir mannrán og misþyrmingar.

Ein kona til viðbótar hefur gefið sig fram við lögregluna og sagt að Weldon hafi rænt henni í febrúar og misþyrmt henni.

Fyrir dómi kom fram að saksóknari á von á að Weldon verði birtar fleiri ákærur á næstu dögum, þar á meðal fyrir að hafa myrt konurnar þrjár.