Portúgölsk kona, Luisa Maria Mariu Ramos Soares Crick hefur verið dæmd til tveggja ára og sex mánaða fangelsisvistar fyrir stórfellt fíkniefnalagabrot. Luisa var sakfelld fyrir að hafa á gamlársdag árið 2017 staðið að innflutningi á á 2.100 ml. af vökva sem innihélt kókaín, en sannað þótti að hún var burðardýr í málinu.

Fram kemur í ákæru að efnið hafi verið ætlað til söludreifingar hér á landi í ágóðaskyni en samkvæmt matsgerð rannsóknarstofu Háskóla Íslands í lyfja- og eiturefnafræði myndi vökvinn samsvara 2340 g af efni.

Luisa flutti efnin til Íslands, sem farþegi með flugi WW-903 frá Kaupmannahöfn í Danmörku til Keflavíkurflugvallar, en tollverðir fundu efnin falin í tveimur sjampóbrúsum, einum krembrúsa og tveimur hvítvínsflöskum í farangri ákærðu við komu hennar til Keflavíkurflugvallar.

Luisa játaði sök fyrir dómnum en fram kemur að hún hafi ekki sakaferil svo kunnugt sé.

Dómurinn sá ekki tilefni til að ætla að hún hefði sjálf fjármagnað innflutninginn heldur hefði hún tekið að sér að flytja þau inn gegn greiðslu.

Luisa lýsti yfir mikilli iðrun vegna brotsins, sem var tekið til greina við refsiákvörðun dómsins, auk þeirrar staðreyndar að hún játaði sekt sína í málinu.

Þótti hæfileg refsing vera fangelsi í tvö og hálft ár en frá þeirri dagatölu dregst gæsluvarðhald sem hún hefur sætt frá áramótum.