Mream Ashkan Shaema er tveggja barna móðir frá Kúrdistan sem sótt hefur um hæli hér á landi. Hún neyddist til að skilja börnin sín tvö eftir í Grikklandi og hefur enga hugmynd um hvort eða hvenær þau geta sameinast henni á Íslandi og farið með henni í gegnum hælisferðlið.

Vakin er athygli á máli Mream á Facebook-síðunni Ekki fleiri brottvísanir en Mream kom til Íslands fyrir tæpum tveimur vikum og hefur sótt hér um hæli. Börnin hennar tvö, 9 og 5 ára, eru föst í Grikklandi, en hún treysti sér ekki að taka þau með í hættulega för yfir fjölda landamæra frá Grikklandi til Íslands.

Fram kemur að fyrir vegabréfalaust fólk á flótta geti ferðir yfir landamæri verið upp á líf og dauða. Eftir hert landamæraeftirlit Evrópuríkja síðan 2016 hefur flóttafólk neyðst til að fara sífellt flóknari og hættulegri leiðir. Fyrir utan þá hættu sem flóttafólki getur stafað af smyglurum, mætir þeim gífurlegt ofbeldi á landamærum Evrópu af hálfu þjóðríkjanna sem eiga í hlut.

Jafnframt segir að Mream lifi í stöðugri óvissu og óttist mjög um líf barna sinna.

„Mream talar við börnin sín í símann á hverjum degi en lifir í stöðugum ótta yfir að einn daginn svari þau ekki. 5 ára sonur hennar á við heilsufarsleg vandamál að stríða, en það líður yfir hann í tíma og ótíma. Börnin eru nú í umsjá kunningja konunnar.“

Samkvæmt reglum Útlendingastofnun verður ekki hægt að sameina fjölskylduna fyrr en Mream hefur formlega fengið stöðu flóttamanns hér á landi. ÚTL getur hins vegar engin svör gefið um hversu langt ferlið verður. Ekki er óalgengt að fólk þurfi að bíða í meira en ár eftir niðurstöðu.

„Það er undir íslenska ríkinu komið hvort börnin sleppi úr óöruggum aðstæðum í Grikklandi og fái að vera með móður sinni hér,“ segir jafnframt í færlsunni um leið og fólk er hvatt til að þrýsta á yfirvöld varðandi stöðuna í málefnum útlendinga hér á landi.