Að minnsta kosti átján einstaklingar hafa að undanförnu greinst með mjög sjaldgæfa tegund krabbameins. Um er að ræða sortuæxli í auga en þessi tegund krabbameins greinist aðeins í um sex einstaklingum fyrir hverja milljón.

Það sem vekur einna mesta athygli er að allir þessir átján einstaklingar tengjast tveimur tiltölulega litlum bæjum í Bandaríkjunum; Huntersville í Norður-Karólínu og Auburn í Alabama.

Meðal þeirra sem hafa greinst með þessa tegund krabbameins eru þrjár vinkonur sem allar kynntust í háskólanum í Auburn: Juleigh Green, Allison Allred og Ashley McCrary. Allar eru þær í meðferð við sjúkdómnum og er óvíst með bata.

Marlana Orloff, augnsérfræðingur við Thomas Jefferson University í Philadelphia, hefur skoðað málið. Hún bendir á í samtali við CBS að velflestir kannist ekki einu sinni við einstaklinga sem hafa greinst með þessa tegund krabbameins. Telur hún að líklega sé ekki um neina tilviljun að ræða en enn sem komið er vita læknar og vísindamenn ekki hvers vegna þessi tegund krabbameins herjar á íbúa þessara litlu svæða.

Þessi tegund krabbameins í auga er mun sjaldgæfari en til dæmis sortuæxli í húð, en þó er vitað að áhættuþættir eru til dæmis ljós húð, ljós augu og útfjólubláir geislar, til dæmis úr ljósabekkjum. Meðaaldur þeirra sem greinst hafa er 55 ár en vinkonurnar í Alabama voru á aldrinum 27 til 32 ára þegar þær greindust.