VR auglýsir eftir dæmum og gögnum frá fólki sem hefur orðið fyrir óeðlilegri hækkun á húsaleigu undanfarið og er heitið fullum trúnaði. Hægt er að senda reynslusögurnar á vr@vr.is Í tilkynningu VR um málið segir:

„Á undanförnum misserum hefur heyrst af ótrúlegum dæmum um svívirðilega hækkun á húsaleigu fólks sem getur ekki hönd fyrir höfuð borið á vægðarlausum leigumarkaði. Við hjá VR viljum berjast af alefli gegn þessari vá og biðlum því til landsmanna um að senda okkur í trúnaði gögn með dæmum um slíkar hækkanir. Dæmi eru um leigufélög sem skirrast ekki við að demba tugprósenta hækkunum leigugjalds á varnarlausar fjölskyldur sem að öðrum kosti lenda á götunni. Við hjá VR viljum vera rödd þessa fólks sem flest er í þeirri stöðu að geta ekki tjáð sig um málið af ótta við að missa húsnæði fjölskyldunnar.“