Það þekkja flestir umræðuna um bólusetningar barna og þær vangaveltur hvort þær geti haft skaðleg áhrif á börn, til dæmis valdið einhverfu. Bólusetningar gegna þó mikilvægu hlutverki og koma í veg fyrir alvarlega smitsjúkdóma.

Nú hafa bresku dýralæknasamtökin lýst áhyggjum sínum af því að sífellt fleiri hundaeigendur kjósa að láta ekki bólusetja hundana sína. Rökin fyrir því eru þau sömu; gæludýraeigendur telja að bólusetningarnar geti haft skaðleg áhrif á dýrin þegar staðreyndin er allt önnur.

Breska blaðið Telegraph fjallaði um þetta og sagði að nú væri komin fram hreyfing hundaeigenda sem talaði fyrir sniðgöngu bólusetninga. Hér á landi eru hundar bólusettir fyrir til dæmis smáveirusótt og smitandi lifrarbólgu.

Bresku dýralæknasamtökin sendu út yfirlýsingu vegna málsins þar sem þau hvetja hundaeigendur til að láta bólusetja hundana sína. Langt því frá allir hundaeigendur láta bólusetja dýrin sín og hafa samtökin áhyggjur af þeirri þróun.

„Það er ekkert sem bendir til þess að bólusetningar valdi einhverfu hjá hundum,“ sögðu samtökin í yfirlýsingu sinni. „Öll lyf geta valdið aukaverkunum en þær eru sjaldgæfar þegar bóluefni eru annars vegar,“ sögðu samtökin og bættu við að ávinningurinn af bólusetningum væri margfalt meiri en hugsanlegar aukaverkanir af völdum þeirra.