Björn Leví Gunnarsson, þingmaður Pírata, spurði forsætisráðherra í sex liðum um ferðakostnað og dagpeninga ráðherra og ráðuneytisstjóra á dögunum.
Í dag bárust svör Katrínar Jakobsdóttur forsætisráðherra en Björn Leví beinir sjónum sínum sérstaklega að svari Katrínar við sjöttu og síðustu spurningunni sem hljóðaði svo:
„6. Hversu oft og hve háar voru árlegar endurgreiðslur ráðherra og ráðuneytisstjóra vegna styrkja og hvers konar hlunninda sem þeir nutu erlendis og eiga samkvæmt reglum ferðakostnaðarnefndar að koma til frádráttar almennum dagpeningagreiðslum?“
Þannig svarar Katrín:
„Samkvæmt 7. gr. reglna nr. 1/2009 skulu styrkir og hvers konar hlunnindi varðandi gistingu og fæði sem ríkisstarfsmenn njóta meðan á dvölinni stendur koma til frádráttar almennum dagpeningagreiðslum eftir því sem við á og unnt er að meta hverju sinni. Á ferðalögum ráðherra og ráðuneytisstjóra ber við að gestgjafi eða sá aðili sem hýsir fund bjóði veitingar eða standi fyrir kurteisisviðburði sem hæfir tilefninu. Hefð hefur ekki skapast fyrir því að leggja sérstakt mat á umfangið þannig að það hafi leitt til frádráttar frá almennum dagpeningagreiðslum.“
Björn Leví undrast þetta svar í færslu sinni á Facebook:
„Hefð hefur ekki skapast fyrir því að leggja sérstakt mat …Jæja já. Annars vegar eru greiddir dagpeningar fyrir mat og hins vegar fær ráðherra gefins mat. Það stendur skýrt að „_skulu_ styrkir … koma til frádráttar“. En nei, það er of erfitt að gera að hefð þannig að við skulum bara eyða almannafé frekar en að fara eftir reglum.“