Sigurður Kristinsson var í dag í Héraðsdómi Reykjavíkur úrskurðaður í fjögurra vikna farbannn, eða til 18. maí næstkomandi, að kröfu Lögreglunnar á höfuðborgarsvæðinu í tengslum við rannsókn hennar á umfangsmiklu fíkniefnamáli, Skáksmyglsmálinu svokallaða.

Skáksmyglsmálið hófst þegar torkennilegur pakki var sendur til skrifstofu Skáksambands Íslands frá Spáni í byrjun árs. Reyndist pakkinn innihalda um 8 kíló af fíkniefnum sem falin voru í skákvörum.

Áður hafði Héraðsdómur Reykjavíkur hafnaði kröfu embættisins um tveggja vikna áframhaldandi gæsluvarðhald yfir Sigurði á grundvelli almannahagsmuna, en gæsluvarðhald yfir honum rann út í dag. Þetta kemur fram í tilkynningu frá lögreglu.

Sigurður var handtekinn í janúar og hafði því verið í haldi lögreglu í tólf vikur. Að sögn lögreglu er rannsókn málsins á lokastigi og meðal annars  unnin í samvinnu við spænsk yfirvöld. Þá segir lögregla að rannsókn málsins hafi verið tímafrek og enn sé beðið gagna erlendis frá. Sú gagnaöflun felur þó ekki í sér brýna rannsóknarhagsmuni, að sögn lögreglu.

„Í málum sem þessum, þar sem sakborningur sætir gæsluvarðhaldi, er horft til þess að fullnægjandi rannsókn lögreglu sé lokið á tólf vikum. Það hefur ekki gengið eftir og ákæra hefur ekki verið gefin út. Tafir á rannsókn málsins mega teljast eðlilegar, m.a. vegna umfangs þess,“ segir lögreglan í tilkynningunni.