Bandaríska geimferðastofnunin NASA sendi Tess-gervihnött á loft í nótt en gervihnötturinn fer á braut um jörðina og tunglið. Gervihnötturinn verður notaður við leit að plánetum utan sólkerfisins okkar. Vísindamenn telja að með gervihnettinum verði hægt að finna um 20.000 plánetur og að um 50 þeirra séu á stærð við jörðina.

Gervihnettinum var skotið á loft frá Canaveralhöfða í nótt með SpaceX Falcon 9 eldflaug. Upphaflega átti að skjóta gervihnettinum á loft á mánudaginn en því var frestað til að hægt væri að fara betur yfir geimflaugina og stjórnkerfi hennar.

Tess gervihnötturinn á að finna áhugaverðar plánetur sem eru á braut um mjög skýrar og greinilega stjörnur. Hann mun safna gögnum sem er hægt að nota til að reikna út hversu stórar pláneturnar eru. Í framhaldi af þessu verða pláneturnar skoðaðar með sjónaukum, sem eru á jörðinni, til að komast að hver massi þeirra er og til að rannsaka gufuhvolf þeirra.

Tess leysir Kepler geimsjónaukann af hólmi en hann verður brátt eldsneytislaus og því ónothæfur. Hann verður áfram á braut langt frá jörðinni.

Tess mun fylgjast með 400 sinnum stærra svæði en Kepler gerði, þar á meðal verða 200.000 skærustu stjörnurnar nærri sólkerfinu okkar.