Viðar Guðjohnsen hefur stolið senunni í leiðtogaprófkjöri Sjálfstæðisflokksins í Reykjavík. Á samskiptamiðlum keppist fólk við að deila viðtölum við Viðar og ummælum eftir hann. Flest hafa þau fallið á Útvarpi Sögu. Þangað til í dag hafa sennilega fæstir þekkt Viðar – nú er hann strax orðinn landsþekktur fyrir skoðanir sem teljast lengst úti í jaðri.

Á forsíðumynd af frambjóðendunum sem birtist í Fréttablaðinu í dag hefur Viðar lætt hönd sinni yfir öxl Áslaugar Friðriksdóttur. Hann virkar eins og algjör senuþjófur. Hinir frambjóðendurnir kunna honum varla miklar þakkir fyrir.

Annars er ekki sérlega auðvelt að segja hvernig prófkjörið fer. Kjartan Magnússon er sagður hafa unnið geysilega vel innan flokksins, mætt á fundi, hann þekkir fólkið og gæti uppskorið eftir því. Konur í flokknum – sem hafa oft átt undir högg að sækja – fylkja sér líklega að bak Áslaugu Friðriksdóttur. Eyþór kemur að utan, var í bæjarstjórn í Árborg, en reyndar upprunninn í Vesturbænum og býr þar nú. Hann er einn aðaleigandi Morgunblaðsins, fyrirferðarmikill í viðskiptalífinu en umdeildur. Baráttan stendur væntanlega milli þeirra þriggja.

Vilhjálmur Bjarnason bauð sig óvænt fram á síðustu stundu. Hann býr í Garðabæ, var þingmaður Suðvesturkjördæmis, en er upprunninn í Hlíðunum. En eins og það var orðað í mín eyru hefur hann ekki sérlega sterkan „prófíl“ í borgarmálunum.