Nú heyrist ekki hósti eða stuna frá forystumönnum stjórnmálaflokkanna. Eru þeir búnir að gefast upp á að mynda stjórn? Farnir að undirbúa jólin?

Eða eru einhverjar þreifingar í gangi? Eins og staðan er finnst manni líklegt að ekki verði nein stjórn fyrr en á nýju ári.

Ríkisstjórn Sjálfstæðisflokks og Framsóknarflokks situr enn. Hún getur varla gert það miklu lengur, enda hefur hún ekki þingmeirihluta.

Það komu 32 nýir þingmenn inn á Alþingi í kosningunum í október. Líklega langar þá fæsta að missa sæti sín aftur eftir svo stuttan tíma.

En á einhverjum tímapunkti þarf að mynda stjórn, hvort sem það verður meirihlutastjórn eða minnihlutastjórn – eða jafnvel utanþingsstjórn.

Síðasti möguleikinn er reyndar nokkuð fjarlægur, ekki hefur setið utanþingsstjórn á Íslandi síðan í heimsstyrjöldinni síðari, það var svonefnd Kóka-kóla stjórn.

Þarna er líka spurning um valdið til þingrofs og til þess að boða til nýrra kosninga, ef sú verður niðurstaðan. Vart er hægt að líta svo á að Sigurður Ingi Jóhannsson hafi þetta vald núna þótt hann sitji sem forsætisráðherra til bráðabirgða.

Forseti Íslands getur tæplega rofið þing upp á sitt eindæmi.

Það yrði semsagt fyrst að koma saman stjórn sem hefði stuðning eða hlutleysi meirihluta þingheims, forsætisráðherra hennar gæti síðan rofið þing, boðað til kosninga, og ríkt fram að þeim.