Exista, félagið hvers hlutur fór úr 40 í 0,02 á rúmu ári, á í viðræðum um endurskoðun lánasamninga og uppgjör gagnkvæmra krafna.

Þeir kunna að koma orðum að því þessir herramenn. Svona frétt þarf eiginlega að setja í gegnum sérstaka þýðingavél.

Samkvæmt Morgunblaðsfrétt skuldar Exista 255 milljarða króna, en þar af nema skuldir gagnvart íslenskum lánastofnunum 125 milljörðum.

Þegar talað er um uppgjör gagnkvæmra skulda er um að ræða gjaldeyrisskiptasamninga. Exista ásamt KB-banka, sem það átti stóran hlut í, og Kjalari, félagi Ólafs Ólafssonar, gekk harðast fram í að fella krónuna.

Í Moggafréttinni segir:

„Stærstur hluti krafna Exista byggir á vörnum félagsins á eigin fé gegn sveiflum í öðrum myntum gagnvart uppgjörsmynt félagsins, evru

Með þessu móti gátu þessi félög sýnt þokkalega stöðu – tímabundið – en til lengdar var þetta eins og pissa í skóinn sinn til að halda á sér hita.

Og þetta sýnir að í aðdraganda hrunsins var það orðinn einn helsti atvinnuvegur á Íslandi að braska með gjaldeyri. Hreinræktuð stóriðja.

Helstu dótturfélög Exista á Íslandi eru VÍS, Síminn og Lýsing – sem væntanlega eru í höndum ríkisins nema Existamenn fái sérstöku fyrirgreiðsluna sem þeir óska eftir.

Í sömu frétt í Fréttablaðinu stendur að staða Exista sé óljós. Það er varfærnislega orðað, því fyrirtæki með svona skuldabagga er auðvitað gjaldþrota. Það rekur einhvers staðar á milli lífs og dauða og í rauninni zombie-fyrirtæki, eða svefngenglafyrirtæki eins og Gauti B. Eggertsson hagfræðingur orðaði það í Silfrinu fyrir viku.