Það er merkileg staða á þriggja ára afmæli Búsáhaldabyltingarinnar – sem farið er að kalla Pottaglamrið í Mogganum – að flokkanir sem tóku við völdum eftir hana séu að springa innanfrá.
Þrír þingmenn hafa þegar farið úr VG, það er eiginlega ekki hægt að ímynda sér þeir sem eftir eru geti starfað saman lengur. Fullur fjandskapur virðist vera á milli Steingrímsliðins og þeirra sem eru í hópi Ögmundar Jónassonar. Það er vandséð að flokkurinn geti haldið saman í óbreyttri mynd fram að kosningum.
Samfylkingin virtist sæmilega heillegur flokkur framan af í stjórnarsamstarfinu, en það er liðin tíð. Mikil óánægja er með Jóhönnu Sigurðardóttur í ákveðnum hópi – meira að segja forseti þingsins, Ásta Ragnheiður Jóhannesdóttir, gekk úr liði flokksformannsins í gær, en Sigmundur Ernir Rúnarsson virðist hafa gert ráðstafanir til að ekki væri hægt að kalla inn varaþingmann fyrir hann. Össur mætti svo á síðustu stundu og greiddi atkvæði gegn frávísunartillögunni.
Ríkisstjórnin tórir þó enn, Össur segir að þetta mál muni ekki sprengja hana, en það er ekki vegna eindrægninnar innan hennar, heldur fremur vegna skorts á valkostum, ósamlyndis innan þings, veikrar stjórnarandstöðu og ótta við kosningar.
