Spennustigið hækkar ört vegna skuldaniðurfellingartillagnanna sem Sigmundur Davíð hefur boðað að komi úr nefnd í þessum mánuði.

Þá eru ekki nema í mesta lagi ellefu dagar til stefnu.

Seðlabankinn varar við því að stofnaður sé leiðréttingasjóður í gegnum bankann, segir að það sé ígildi peningaprentunar.

Sigmundur sakar Seðlabankann um að vera í pólitík.

Bjarni Benediktsson er varkár og segir ekki megi auka skuldir ríkissins, hann hafi ekki séð tillögurnar sem séu í smíðum.

Jón Sigurðsson, fyrrverandi seðlabankastjóri og formaður Framsóknarflokksins, skrifar fróðlega grein þar sem hann gerir grein fyrir þeim mælistikum sem hlýtur að vera beitt á fyrirhugaða skuldalækkun, þ.e. hvernig hún dreifist, áhrifin á efnahagsþróun og áhrif á stöðu ríkissjóðs, lífeyrissjóða, Íbúðalánasjóðs og banka.

En Jón staðhæfir í lok greinarinnar:

„Önnur hlið þessa máls er hugmyndir um greiðslur frá erlendum kröfuhöfum til að mæta þessum kostnaði. Afsláttur af kröfum erlendra kröfuhafa eða sérstök gengisfelling í greiðslum til þeirra losar ekki fjármagn til ráðstöfunar. Ekki er því að sjá að neitt fé komi úr þessari átt.“

Það er svo spurning hvort líf ríkisstjórnarinnar sjálfrar er í hættu – þ.e. ef Framsókn nær ekki fram boðuðum skuldaleiðréttingum.