Ég ræddi um daginn við dyggan framsóknarmann sem sagðist ekki trúa því að úrslit kosninga yrðu eins og skoðanakannanir sýndu.

Hann taldi að Sjálfstæðisflokkurinn yrði með sirka 30 prósent en Framsókn í kringum 20.

Og jú, hann sagðist myndu verða hæstánægður með þetta – Framsókn hefur ekki verið yfir 20 prósentum síðan 1995.

Skoðanakönnunin sem birtist í fréttum RÚV í kvöld sýnir að framsóknarmaðurinn, vinur minn, var kannski óþarflega svartsýnn.

Það eru ekki nema 25 dagar til kosninga og Framsókn er með 28,3 prósenta fylgi en Sjálfstæðisflokkurinn er kominn niður í 22,4 prósent.

Þar á bæ er hægt að tala um algjört fylgishrun. Flokkurinn er kominn undir fylgið í kosningunum 2009.

Hvað er þá til ráða hjá Sjálfstæðisflokknum?

Það fer að verða of seint að búa til nýtt plan fyrir kosningarnar. Hvað loforð varðar getur Sjálfstæðisflokkurinn varla toppað Framsókn. Það er líka eins og fólk ætli að kjósa Framsókn þótt það trúi ekki endilega á loforðin – það er frekar eins og menn hugsi að það gæti verið að Framsókn stæði við þau.

Hvað er þá eftir nema að efna til mikillar auglýsingaherferðar? Er það hugsanlega eina úrræðið? Eða eiga kosningastjórar flokksins eitthvað tromp upp í erminni? Veður flokkurinn kannski að reyna að höggva fastar í Framsókn?

Fylgi annarra flokka sætir ekki sérstökum tíðindum miðað við síðustu kannanir, stjórnarflokkarnir eru í tómu tjóni og fátt sem bendir til þessa að þeir rétti úr kútnum, Björt framtíð stendur í stað, en það eru Píratar sem eru líklegastir af nýju framboðunum til að komast að.

Úrtakið í könnuninni var stórt, eða 7300 manns. 40 prósent svöruðu ekki. Kannski leynist þar einhver von fyrir ný framboð? Sjá nánar á vef Ríkisútvarpsins.