Kanadísk yfirvöld hafa ákveðið að flytja fjölskyldur stjórnarerindreka sinna heim frá Kúbu. Ákvörðunin er tekin í kjölfar þess að 10 Kanadamenn, sem hafa verið við störf á Kúbu, hafa upplifað dularfull heilsufarsvandamál. Ekki er ljóst hvað veldur og eru kanadísk stjórnvöld að rannsaka málið.

CTV News skýrir frá þessu. Málið minnir mjög á það sem fjöldi bandarískra stjórnarerindreka hefur lent í á Kúbu á undanförnum misserum. Þá sögðu bandarísk stjórnvöld að hugsanlega hefði verið ráðist á fólkið með hátíðnihljóðum. Það er nú talið ósennilegt en engin önnur haldgóð skýring hefur þó fundist á dularfullum veikindum stjórnarerindrekanna. Læknar hafa þó áhyggjur af að veikindi fólksins séu ný tegund heilaskaða en hvað veldur skaðanum er hins vegar ekki vitað.

Einkenni veikindanna eru svimi, höfuðverkur og ógleði. Kanadískir stjórnarerindrekar og fjölskyldur þeirra fóru að kvarta undan einkennunum á síðasta ári. Engin ný tilfelli hafa komið upp frá því síðasta haust en þeir sem veiktust finna enn fyrir einkennum.

Kanadísk stjórnvöld vilja gæta fyllstu varúðar og hafa því ákveðið að stjórnarerindrekar megi ekki taka fjölskyldur sínar með til Kúbu. Einnig er verið að leggja mat á hvort fækkað verði í starfsliði sendiráðsins í Havana en þar eru nú 15 stjórnarerindrekar við störf. Kanadísk stjórnvöld telja jafn hættulegt að starfa í sendiráðinu á Kúbu og í Afganistan.

Bandarísk stjórnvöld fækkuðu starfsfólki í sendiráði sínu í Havana á síðasta ári af sömu ástæðu og vísuðu 15 kúbverskum stjórnarerindrekum úr landi í refsingarskyni fyrir að Kúba hefði ekki gert nóg til að vernda bandaríska stjórnarerindreka.

Kúbverska stjórnin hefur neitað allri vitneskju um málið. Þarlend stjórnvöld hafa í gegnum tíðina átt í vinsamlegum samskiptum við Kanada.