Það kom mörgum á óvart þegar Donald Trump vísaði 60 rússneskum stjórnarerindrekum úr landi nýlega. Þetta voru viðbrögð Bandaríkjastjórnar við meintri morðtilraun rússneskra stjórnvalda við Skripal feðginin sem eitrað var fyrir í Bretlandi. Vesturlönd höfðu sammælst um að bregðast harkaleg við meintri árás Rússa og að vera samstíga í viðbrögðum.

En það kom á óvart hversu mörgum stjórnarerinddrekum Bandaríkin vísuðu úr landi, sérstaklega í ljósi þess að ríki eins og Þýskaland og Frakkland vísuðu hvort um sig fjórum rússneskum stjórnarerindrekum úr landi. Washington Post segir að Trump hafi alls ekki ætlað að vísa svona mörgum Rússum úr landi. Hann var staddur á golfvelli sínum í Mar-a-Lago í Flórída þegar málið var til afgreiðslu og sagði ráðgjöfum sínum að Bandaríkin myndu vísa jafnmörgum stjórnarerindrekum úr landi og Evrópa.

„Við verðum ekki í fararbroddi. Við jöfnum.“

Er hann sagður hafa sagt eftir því sem ónafngreindur heimildarmaður sagði Washington Post.

Daginn eftir að tilkynnt var um brottvísanirnar er Trump sagður hafa orðið öskureiður þegar hann sá að fjölmiðlar sögðu Bandaríkin vera það ríki sem hefði brugðist harkalegast við og vísað flestum úr landi. Ráðgjafar hans fullvissuðu hann um að fjöldinn væri nokkurn veginn sá sami og fjöldi brottvísana frá Evrópuríkjum.

Trump er sagður hafa svarað því til að honum væri sama um heildartöluna og bölvandi er hann sagður hafa vísað til fjölda stjórnarerindreka sem Frakkar og Þjóðverjar vísuðu úr landi. Hann hafi viljað jafna þann fjölda sem einstök ríki vísuðu úr landi en ekki heildartöluna.