„Svei mér þá! Er maður ekki bara lentur í því að þurfa að hrósa ráðherrum nýrrar ríkisstjórnar á fyrsta degi. Samgönguráðherra (ofl.) kemur sterkur inn og sýnir skilning á mikilvægi Reykjavíkurflugvallar,“ skrifar Sigmundur Davíð Gunnlaugsson, þingmaður Framsóknarflokksins og fyrrverandi forsætisráðherra, á fésbókarsíðu sína fyrir rúmri klukkustund síðan. En þess má geta að margir hafa gagnrýnt Jón Gunnarsson, sem er orðinn ráðherra yfir samgöngu-, fjarskipta- og byggðamálum. Þar á meðal Gísli Marteinn Baldursson, sjónvarpsmaður og fyrrverandi borgarfulltrúi, sem lét þau orð falla um Jón Gunnarsson á Twitter að hann byrjaði ömurlega í starfi. Það var útaf því að Jón hafði látið hafa eftir sér að engin önnur lausn væri í stöðunni en að hafa Reykjavíkurflugvöll áfram í Vatnsmýrinni.

Sigmundur Davíð er augljóslega mjög ósammála Gísla Marteini og finnst Jón Gunnarsson hafa byrjað vel.

Sigmundur Davíð heldur síðan áfram að tala um Jón Gunnarsson, þingmann Sjálfstæðisflokksins og núverandi ráðherra, í fésbókarfærslu sinni og segir: „Vonandi nær hann saman við Framsókn og flugvallarvini í borginni um enduropnun neyðarbrautarinnar. Svo virðist utanríkisráðherrann gefa til kynna að hann muni halda áfram vinnu forveranna við að nýta Brexit og breytingar á ESB. Nú er bara að vona að aðrir í stjórnarflokkunum leyfi þeim að ná árangri í þessum málum.“

Börkur Gunnarsson tók saman.