Birgitta Jónadóttir þingflokksformaður Pírata segir að hún muni hætta á þingi eftir þetta kjörtímabil líkt og hún hafi gefið út í ágúst síðastliðnum.
Birgitta var ekki afgerandi þegar hún svaraði því hvort hún ætlaði að standa við stóru orðin þegar hún var spurð í kvöldfréttum RÚV í gær og var hún í kjölfarið hvatt af fjölmörgum samflokksmönnum sínum að ganga á bak orða sinna og gefa kost á sér á nýjan leik. Var meðal annars kosið óformlega um málið inni á Pírataspjallinu þar sem naumur meirihluti var fyrir því að Birgitta myndi hætta til að skaða ekki trúverðugleika flokksins. Þess má þó geta að Birgitta gaf það út árið 2014 að hún væri á sínu síðasta kjörtímabili en hætti svo við að hætta.
Á Fésbók nú í morgun tekur hún af öll tvímæli um að hún ætli ekki að hætta:
Ég hef lofað sjálfri mér því að hætta eftir þetta kjörtímabil, óháð lengd þess. Það er ekkert sem getur fengið mig til að skipta um skoðun. Ég er snortin af þeirri bylgju hvatningar að fara fram aftur sem ég hef fundið fyrir þvert á flokka sem og í grasrót minni. Ástæða þess að ég hef ekki viljað koma með þessa yfirlýsingu strax er einfaldlega vegna þess að þessu kjörtímabili er ekki lokið, þrátt fyrir að núverandi stjórn sé fallinn,
segir Birgitta. Hún segir ákall hafa verið um að hún svari skýrt hvort hún gefi kost á sér á ný eður ei, bæði meðal Pírata og meðal pólitískra andstæðinga:
Ég vil ekki halda fólki í óþarfa óvissu. Ég mun að sjálfsögðu þrátt fyrir að vera ekki í framboði í næstu kosningum, halda áfram að berjast fyrir réttlátara samfélagi og þeim breytingum sem ég hef lagt þunga á að ná í gegn hérlendis sem og erlendis.
Birgitta hefur skorað á Helga Hrafn Gunnarsson fyrrverandi þingmann Pírata að gefa kost á sér í komandi kosningum.
