Væringarnar í Framsóknarflokknum undanfarið, með brotthvarfi Sigmundar Davíðs Gunnlaugssonar og stofnun Miðflokksins, hafa ýmsar sérkennilegar afleiðingar. Þannig hafa til dæmis báðir borgarfulltrúar Framsóknar- og flugvallarvina snúið baki við flokknum. Þetta þýðir að þegar borgarstjórn fundar í næstu viku mun Framsóknarflokkurinn ekki eiga þar fulltrúa.

Líf Magneudóttir, borgarfulltrúi VG og forseti borgarstjórnar, vekur athygli á þessari sérkennilegu stöðu á Facebook:

Borgarstjórnarfundurinn eftir viku verður Framsóknarlaus. Þetta hefur ekki farið hátt en laust mig skyndilega. Þessi pólitík er ansi hressileg.

Oddviti Framsóknarflokksins, Sveinbjörg Birna Sveinbjörnsdóttir, gekk fyrst úr skaftinu en eftir brotthvarf hennar úr flokknum hafa litlir kærleikar verið milli hennar og Guðfinnu Jóhönnu Guðmundsdóttur, sem sat eftir í flokknum.

Guðfinna Jóhanna hefur hins vegar nú einnig yfirgefið flokkinn og er gengin til liðs við Miðflokk Sigmundar Davíðs. Framsókn á því ekki lengur borgarfulltrúa en flugvallarvinir væntanlega enn tvo, sem þó eru klofnir. Þær hafa hins vegar ákveðið að starfa áfram með borgaramálahópi Framsóknar og flugvallavina. Miðflokkurinn hefur síðan vitaskuld í leiðinni eignast borgarfulltrúa í Guðfinnu Jóhönnu.