Bjarni Benediktsson formaður Sjálfstæðisflokksins sækir fast að því að fá sex ráðherra í hlut Sjálfstæðisflokksins í ríkisstjórninni en Vinstri græn og Framsóknarflokkurinn taka það ekki í mál. Þetta segir Björn Valur Gíslason fyrrverandi varaformaður Vinstri grænna í færslu á Fésbók.

Björn Valur segir Sjálfstæðismenn eiga í miklum vandræðum með ráðherraval í væntanlegri ríkisstjórn Sjálfstæðisflokks, VG og Framsóknarflokks. Fram kom í kvöldfréttum RÚV í gær að það sjái fyrir endann á stjórnarmyndunarviðræðunum og vel sé vandað til verka til þess að tryggja ríkisstjórninni líf út kjörtímabilið.

Björn Valur segir að það verði ekki þolað innan Sjálfstæðisflokksins að það halli á konur í ráðherraliðinu:

Það liggur fyrir að formaður flokksins verður ráðherra og sennilegt að Kristján Þór Júlíusson fylgi honum. Sigríður Andersen mun líklega verða fulltrúi Reykjavíkur í ráðherraliði sjálfstæðisflokksins og Þórdís Kolbrún Reykfjörð Gylfadóttir er talin líkleg til að halda sínu sæti í ríkisstjórninni í krafti þess að vera kona. Ekki er talið ólíklegt að Bjarni sæki þriðja ráðherrann utan þingflokksins sem yrði þá Unnur Brá Konráðsdóttir,

segir Björn Valur. Það þýði að Guðlaugur Þór Þórðarson utanríkisráðherra og Jón Gunnarsson samgönguráðherra hverfi úr ríkisstjórninni í óþökk þeirra beggja:

Bjarni mun hafa sótt það fast að fá sjötta ráðherrann til að draga úr óánægjunni sem mun vera innan þingflokksins, annars vegar með ríkisstjórnarmyndunina og hins vegar með ráðherraskipan. En það hafa hinir flokkarnir tveir ekki tekið í mál, hvað sem síðar kann að verða.