Heiða Birgisdóttir yfirhönnuður hjá Cintamani situr fyrir svörum að þessu sinni í kynningum okkar á þátttakendum í Reykjavík Fashion Festival.

RFF hátíðin er stærsti tískuviðburður á Íslandi í ár og verður haldin í Hörpu föstudaginn 24., og laugardaginn 25. mars. Ennþá er hægt að næla sér í miða á þennan glæsilega viðburð.

Gefum Heiðu orðið!

Vivienne Westwood býður þér í kvöldverð – í hverju ferðu og hvern tekur þú með þér?

Ég væri örugglega með valkvíða fram á síðustu stundu, en kjóll frá Hildi Yeoman er á óskalistanum og ætli ég mundi ekki nota tækifærið og kaupa mér einn slíkan. 11 ára sonur minn spurði hvort ég mundi ekki taka hann með.

Hvaða stórstjörnu mundirðu vilja sjá í fötunum þínum?

Hmm, ég spái lítið í svoleiðis, en ég held að ég verði að segja Björk. Annars skiptir mig mestu máli að fólk sem gerir kröfur á gæði í bland við útlit vilji klæðast hönnun minni.

Lýstu hönnun þinni í 5 orðum

Úff, það er erfitt að lýsa hönnun sinni. 5 stikkorð: þægindi, smáatriði, samspil með efni, áferð og munstur.

Ef þú mættir bara klæðast tveimur litum í heilt ár, hvaða litir yrðu það?

Svörtu og gráu.

Nefndu þrjár persónur eða atriði sem hafa mikil áhrif á hönnun þína

Útivera, náttúran og tónlist hafa mikil áhrif á hönnun mína.

Hvaða tónlist er í spilaranum?

Ennio Morricone, First Aid Kit, Bonobo, Bob Dylan.

Hvar verður þú eftir fimm ár?

Vinna minna, leika meira.

Hvað er best við RFF?

Að hafa tækifæri til að sýna afrakstur vinnunnar og svo er bara gaman og gott að hitta aðra í bransanum.

Hvar er hægt að fylgjast með þér?

instagram: cintamani_iceland
instagram: heidanikita
Facebook Heida Birgisdottir