Bókin Hjálp, barnið mitt er grænmetisæta kom út á dögunum. Bókinni lýsir höfundurinn, Jón Yngvi Jóhannsson, sem matreiðslubók fyrir ráðvillta foreldra, vanafasta heimiliskokka, fátæka námsmenn og alla aðra sem ættu að borða meira grænmeti. Jón Yngvi heldur úti skemmtilegri facebook síðu sem tengist bókinni – en þar birtir hann reglulega uppskriftir og góð ráð sem hefðu getað ratað í bókina en gerðu það ekki.
Þar á meðal er þessi frábæra uppskrift að fíflasírópi sem hann var svo huggulegur að leyfa okkur að birta hér fyrir lesendur Bleikt.
Vegna fjölda (ja, að minnsta kosti tveggja) áskorana birtist hér uppskrift sem er ekki í bókinni. Þetta er fíflasíróp sem ég bý til á hverju vori og nota mikið. Ég nota það eins og hlynsíróp á pönnukökur, í bakstur, til að bragðbæta sósur og ef verulega vel liggur á mér bý ég til úr því karamellur með sjávarsalti.
Fyrst þarf að tína fíflana, bara blómin sjálf, ekki stilkana. Það er best að gera í sól þegar þeir eru alveg opnir. Fólk sem er mjög pjattað ætti að vera með hanska, fíflarnir smita mjög sterkum lit sem getur tekið tíma að skrúbba af fingrunum.
Þegar ca. 250 fíflablóm eru komin í hús er manni ekkert að vanbúnaði að hefjast handa við að sjóða sírópið.
275 g fíflablóm (um 250 stk)
1 l vatn
1 kíló sykur (þetta er síróp!)
1 sítróna
Sjóðið vatnið, hellið því yfir fíflana og látið standa yfir nótt. Sigtið þá soðið frá og bætið sykrinum og safanum úr sítrónunni við. Sjóðið við vægan hita þar til sírópið er orðið tært og aðeins farið að þykkna. Fleytið froðuna sem myndast ofan af sírópinu jafn óðum. Ég sýð síróp í ca. klukkutíma, aðrar uppskriftir gefa upp styttri suðutíma.
Að lokum er sírópið sett í hreinar flöskur eða krúsir. Ef maður vandar sig geymist það næstum endalaust, sykur er jú rotvarnarefni.
