„Ég hef svolitlar áhyggjur af því hvernig menn ætla að ráðast í þetta. Ég held að það sé mjög mikilvægt að setja strax töluvert fé í heilbrigðiskerfið. Ég held að það sé ekki nóg að setja fimm ára áætlun sem gerir ráð fyrir því að við aukum fé til heilbrigðismála 30 milljarða á fimm árum.“

Þetta sagði Kári Stefánsson í sjónvarpsþættinum Eyjunni sem sýndur er á Stöð 2. Kári afhenti í gær stjórnvöldum á níunda tugþúsunda undirskrifa sem hann hefur safnað í baráttu sinni fyrir auknum útgjöldum til heilbrigðiskerfisins. Kári sagði jafnframt:

„Ég held að það sé óhjákvæmilegt að auka samneysluna og ef það þarf að hækka skatta til þess, þá gerum við það.“

Kári sagðist einnig skynja að tónn stjórnvalda hefði breyst og þeir skynjuðu ekki söfnunina lengur sem ógn. Telur vísindamaðurinn að stjórnmálamenn geri sér betur rein fyrir að eyða þurfi meiru í heilbrigðismál.

Kári bætti við:

„Það er alveg fullt af peningum og ég er mjög þakklátur fyrir að heyra þá tölu út úr munni þeirra sem sitja nú og stjórna. En þannig er mál með vexti að það er tiltölulega lítill vandi að lofa upp í ermina á sér og það er sérstaklega lítill vandi að lofa upp í ermina á öðrum. Vegna þess að það eru kosningar i haust og maður veit aldrei hverjir koma til með að skipa þá ríkisstjórn sem við tekur.“

Kári bætti ennfremur við að hann færi að gera stjórnarflokkunum mikinn greiða. Nú viti þeir hvað þjóðin vill.

„Ef það verður ekkert nýtt fé sett í heilbrigðismál fyrir kosningar þá er ég handviss um að ríkisstjórnarflokkarnir verða flengdir í kosningunum.“

Þá sagði Kári á öðrum stað:

„Munurinn á milli þeirra sem eiga og eiga ekki hefur verið að aukast, það er krafa um að lækka skatta sem þýðir minna fjármagn til samneyslunnar. Ég held því fram að við séum samfélag sem krefst meiri félagshyggju. Þetta er svo lítið samfélag, við erum svo nálægt hvoru öðru og það er mjög erfitt fyrir okkur að búa við þann mikla mun sem er orðinn til.“

Hér má horfa á viðtalið í heild sinni: