Ríkisstjórn Íslands samþykkti á fundi sínum í morgun að veita 170 milljónum króna til Flugþróunarsjóðs á þessu ári. Jafnframt er gert ráð fyrir að sjóðurinn hafi 300 milljónir króna til ráðstöfunnar á ári næstu ár. Þetta kemur fram í tilkynningu frá atvinnuvega- og nýsköpunarráðuneytinu. Þar segir enn fremur að markmiðið með sjóðnum sé að koma á reglulegu millilandaflugi um aðra flugvelli en Keflavík.

Það var þann 30. október síðastliðinn að ríkisstjórn Íslands samþykkti að fela iðnaðar- og viðskiptaráðherra að hefja undirbúning að stofnun flugþróunarsjóðs, en samþykktin byggði á tillögum nefndar sem forsætisráðherra skipaði um aukna möguleika í millilandaflugi.

Í tilkynningu ráðuneytisins segir að iðnaðar- og viðskiptaráðherra leggi á það áherslu að sjóðurinn skuli settur á laggirnar strax á þessu ári.

Sjö manna stjórn verður yfir sjóðnum og skipar iðnaðar- og viðskiptaráðherra formann án tilnefningar. Aðrir stjórnarmenn verða tilnefndir af forsætisráðherra, fjármála- og efnahagsráðherra, Markaðsstofu Norðurlands, Austurbrú, Isavia og Íslandsstofu. Stjórnin ber ábyrgð á að úthlutanir sjóðsins samrýmist ríkisaðstoðarreglum EES-samningsins og þá skal hún setja sér starfsreglur til samræmis við tillögur nefndarinnar.

Ráðuneytið mun á næstu dögum óska eftir tilnefningum fyrrgreindra aðila í stjórn sjóðsins en gert er ráð fyrir að hún geti tekið til starfa um miðjan apríl.