Íslensk-norski þingmaðurinn Mímir Kristjánsson kallar eftir því að norskir fjölmiðlar sýni konungsfjölskyldunni þar í landi meiri tillitssemi og samúð vegna ástands Mette Marit krónprinsessu sem liggur á sjúkrahúsi vegna lungnasjúkdóms síns en ástand prinsessunnar er alvarlegt.
Mikið hefur mætt á fjölskyldunni undanfarið vegna fyrri tengsla Mette Marit við hinn fræga kynferðisbrotamann Jeffrey Epstein, dómsmáls gegn Marius syni hennar af fyrra hjónabandi vegna gruns um fjölda brota og loks nú vegna ástands prinsessunnar sem liggur eins og áður segir alvarlega veik á sjúkrahúsi en hún er komin á biðlista eftir lungnaígræðslu.
Mímir, sem á íslenskan föður og norska móður, er þingmaður á norska Stórþinginu fyrir flokkinn Rautt (n. Rødt) en flokkurinn er lengst til vinstri í stjórnmálum af öllum þeim flokkum sem eiga sæti á þingi. Stjórnmálamenn með slíkar skoðanir eru yfirleitt ekki hrifnir af konungdæmum og það er raunar stefna flokksins að afleggja hina þingbundnu konungsstjórn í Noregi og gera landið að lýðveldi.
Mímir lætur þá stefnu hins vegar ekki stoppa sig í að kalla eftir því að konungsfjölskyldan fái frið til að huga að Mette Marit. Hann ritar um framgöngu fjölmiðla gagnvart fjölskyldunni á Facebook og segir að nú verði þeir að gefa aðeins eftir:
„Konungsfjölskyldan er augljóslega konungleg, en þau eru líka fjölskylda.“
Mímir segir að almenningur þurfi ekki að sjá myndir teknar úr laumi af tveimur börnum heimsækja móður sína á spítalann en þar á hann við Ingiríði Alexöndru prinsessu og Sverri Magnús prins, börn Mette Marit og Hákons krónprins. Marius fékk hins vegar ekki leyfi til að fá að heimsækja móður sína en hann er í gæsluvarðhaldi.
Mímir segir einnig að almenningur hafi enga þörf fyrir beina útsendingu fjölmiðilsins VG frá stéttinni fyrir utan spítalann:
„Þar sem kona með lungnasjúkdóm kann að deyja.“
Almenningur þurfi heldur ekkert að vita allt um það hvort sonur ( Marius, innsk. DV) fái að vera með móður sinni við það sem í versta falli geti orðið banalega hennar:
„Ekkert af þessu varðar almenning.“
Mímir segir að ekki sé í þessu öllu saman verkefni fyrir norskt samfélag sem heild. Umfjöllunin og fjölmiðlafárið vegna veikinda krónprinsessunnar beri vott um óviðfelldið hugarfar sem einkennist af hjarðhegðun og það þurfi fólk ekki að beygja sig undir.
Mímir segist að lokum taka undir beiðni Kjersti Toppe þingkonu Miðflokksins (n. Senterpartiet) til fjölmiðla um að slökkva á myndavélunum:
„Núna þarf konungfjölskyldan að fá smá frið.“
