Lögreglan hafði í nægu að snúast í nótt, en frá því klukkan 17 í gær þar til klukkan 05 í morgun voru 102 mál bókuð í kerfi lögreglu. Af dagbók lögreglu má ráða að nokkuð var um vandræðagang vegna áfengisdrykkju.

Óskað var eftir lögreglu á skemmtistað vegna einstaklings sem er grunaður um að stela áfengi á staðnum. Var hinn grunaði handtekinn en látinn laus að lokinni skýrslutöku.

Tilkynnt var um einstakling sem var ofurölvi og ósjálfbjarga og hann aðstoðaður heim.

Á hóteli í borginni var óskað eftir aðstoð vegna ölvaðs einstaklings sem var til vandræða. Var umræddur handtekinn og fær að sofa úr sér í fangaklefa þar til hægt verður að ræða við hann.

Leigubílstjóri óskaði eftir aðstoð vegna farþega sem neitaði að borga.

Fram kemur í dagbók lögreglu að í þremur aðskildum málum voru einstaklingar handteknir meðal annars fyrir að neita að gefa upp hverjir þeir eru. Einn þeirra er grunaður um brot á lögreglusamþykkt og var handtekinn þegar hann neitaði að gefa upp hver hann væri. Í öðru máli höfðu lögreglumenn afskipti af einstaklingi sem tók á rás þegar hann var spurður um nafn. Komst viðkomandi ekki langt þar sem lögreglumennirnir voru töluvert sneggri á sprettinum. Reyndist viðkomandi með ætluð fíkniefni á sér og var því handtekinn, en látinn laus að lokinni skýrslutöku. Í þriðja málinu hafði lögregla afskipti af einstaklingi sem var að trufla störf lögreglu. Sá neitaði að gefa upp hver hann væri og var því handtekinn. Þegar upp á lögreglustöð var komið neitaði hann enn að gefa upp nafn og var því vistaður í fangaklefa þar sem hann fær að dúsa þar til hægt verður að komast að því hver hann er.

Lögregla var kölluð út vegna slagsmála utan við skemmtistað, vegna innbrots í fyrirtæki og vegna ölvaðs einstaklings sem var í tökum dyravarða skemmtistaðar.

Fimm eru grunaðir um akstur undir áhrifum fíkniefna. Í einu málinu reyndist ökumaður bifreiðar vera með tvö eggvopn á sér. Fimm eru svo grunaðir um akstur undir áhrifum áfengis.

Lögreglumenn frá lögreglustöðinni við Vínlandsleið voru kallaðir út vegna einstaklings sem var með ógnandi hegðun. Meðan lögregla var á leið á vettvang braut einstaklingurinn rúðu í íbúð aðilans sem óskaði eftir aðstoð lögreglu. Hann var handtekinn en reyndist þá vera andlega veikur og var fluttur á bráðamóttöku til skoðunar.