Mennta- og barnamálaráðuneytið hefur sent frá fréttatilkynningu og gefið upp tímasetningu á því hvenær til stendur að hefja framkvæmdir við viðbyggingu við Fjölbrautaskóla Suðurnesja. Skólameistari skólans hefur sagt starfi sínu lausu eftir að hann hafði fengið takmörkuð svör á fundi í ráðuneytinu um hvenær framkvæmdir hæfust. Í kjölfarið braust út mikil óánægja meðal Suðurnesjamanna. Nemendur skólans gengu út og sveitarstjórnarfólk mótmælti harðlega. Meðal annars fór formaður bæjarráðs Reykjanesbæjar fram á fund með forsætisráðherra og sagði ríkið draga lappirnar við að koma framkvæmdunum, sem þegar hafa verið ákveðnar, af stað.
Kristján Ámundsson skólameistari hefur starfað við skólann frá 1986 en hann leysti af sem skólameistari frá 2008-2011 og tók síðan við embættinu formlega árið 2012. Tilkynnt var fyrr í dag að hann hefði nú sagt starfi sínu lausu þrátt fyrir að eiga eitt ár eftir af fimm ára skipunartíma.
Á Facebook-síðu skólans kom fram Kristján hefði í morgun setið fund með starfsfólki ráðuneytisins um fyrirhugaða viðbyggingu við skólann. Ákvörðun um viðbyggingu fyrir verk- og starfsnám við fjóra framhaldsskóla hafi verið tekin fyrir tveimur árum.
Þar á meðal var Fjöllbrautaskóli Suðurnesja en samið var um þetta í tíð síðustu ríkisstjórnar.
Í frásögninni á Facebook-síðu skólans segir að á fundinum með ráðuneytisfólki hafi komið fram að engar ákvarðanir hafi verið teknar um tímasetningu eða annað varðandi viðbyggingu við skólann. Því sé ljóst að skólinn þurfi að bíða enn um sinn eftir úrbótum varðandi húsnæði fyrir verk- og starfsnám en einnig bóknám og aðstöðu fyrir nemendur og starfsfólk. Skólinn nýti nú þrjá lausa gáma sem kennslustofur og leigi húsnæði á tveimur stöðum í bæjarfélaginu fyrir kennslu. Einnig sé búið að breyta geymslum í kennsluaðstöðu og breyta bóknámsstofum í verklega aðstöðu.
Segir að lokum:
„Nú þegar farið er að þrengja að á öllum sviðum varðandi húsnæði skólans er aðstöðuleysi farið að hafa veruleg áhrif á skólastarfið og starfsemi skólans. Kristján telur nóg komið og hefur ákveðið að hætta störfum við skólann. Hann telur að hann komist ekki lengra með þetta mál og harmar áhugaleysi stjórnvalda á málefnum skólans.“
Í kjölfar ákvörðunar Kristjáns sendi starfsfólk skólans frá sér harðorða yfirlýsingu. Starfsfólkið tók undir með Kristjáni um að harma áhugaleysið, auk þess að fordæma vinnubrögð ráðuneytisins og krefjast þess að framkvæmdir hefjist strax í sumar.
Nemendur tóku einnig þátt í að krefjast lausna á aðstöðumálum skólans en í fréttum Víkurfrétta kemur fram að þeir hafi gengið út úr kennslustundum og boðað að þeir myndu ekki mæta á morgun.
Sveitarstjórnarfólk á Suðurnesjum mótmælti einnig harðlega en meðal þeirra var Halldóra Fríða Þorvaldsdóttir formaður bæjarráðs Reykjanesbæjar í færslu á Facebook:
„Bæjarstjórn Reykjanesbæjar hefur fyrir löngu síðan samþykkt sinn þátt í uppbyggingunni og samþykkt skipulag en ekkert hefur heyrst frá stjórnvöldum sem dregið hafa lappirnar svo furðu sætir. Hjá mér er mælirinn fullur! Það er okkar allra að gæta hagsmuna nemenda og tryggja góða aðstöðu og eðlilega uppbyggingu. Ég hef óskað eftir fundi með forsætisráðherra vegna málsins og þingmönnum Suðurkjördæmis. Einnig mun ég leggja til að bæjarstjórn fundi um stöðuna og sama geri stjórn Sambands sveitarfélaga á Suðurnesjum. Framhaldsskólarnir eru á ábyrgð stjórnvalda en það er okkar að gæta hagsmuna bæjarbúa. Við þetta verður ekki unað stundinni lengur.“
Mennta- og barnamálaráðuneytið hefur nú brugðist við uppsögn Kristjáns og hörðum andmælum Suðurnesjamanna. Í tilkynningu frá ráðuneytinu kemur fram að það vinni að uppbyggingu verknámsaðstöðu framhaldsskóla víðs vegar um landið. Meðal fyrirhugaðra framkvæmda sé uppbygging Fjölbrautaskóla Suðurnesja.
Hönnun sé fyrirhuguð í júní næstkomandi og að verkframkvæmdir geti hafist í janúar á næsta ári. Stefnt sé að því að ljúka verkinu sumarið 2028 og hefja kennslu í nýju húsnæði haustið 2028.
Samhliða þessari uppbyggingu við Fjölbrautaskóla Suðurnesja verði einnig ráðist í framkvæmdir við þrjá aðra verknámsskóla: Verkmenntaskólann á Akureyri, Fjölbrautaskóla Norðurlands vestra og Menntaskólann á Ísafirði. Tímalínur varðandi alla skólana sé svipaðar en fyrir liggi heimild á grundvelli frumathugana til að fara í útboð þar sem boðin verði út hönnun og framkvæmdahluti uppbyggingarinnar.
Til staðar séu uppsafnaðar fjárheimildir sem nýtist við fjármögnun verkefnanna fjögurra. Fráteknar fjárheimildir fyrri ára og fjárheimildir í gildandi fjármálaáætlun fyrir árin 2026-2030 í uppbyggingu verknámsskóla séu tæpir fimm milljarðar króna (4.967 m.kr.). Þær nýtist í uppbyggingu verknámsskólanna fjögurra og uppbyggingu verknámsaðstöðu Fjölbrautaskólans í Breiðholti sem standi nú yfir.
