Réttargæslumaður barna sem sakað hafa fósturforeldra sína að Gauksstöðum í Garði um ofbeldi, bregst hart við yfirlýsingu Jóns Steinars Konráðssonar um málið.
Jón, sem ásamt eiginkonu sinni, Lindu Angelique Elizondo, rak fósturheimili á Gauksstöðum á árunum 2009 til 2019 steig fram með langa yfirlýsingu í gærkvöld sem varðar ásakanir fyrrverandi fósturbarna hans um ofbeldi í sinn garð. Í kjölfar ásakakana sem komu fram árið 2019 óskaði Barnaverndarnefnd eftir lögreglurannsókn sem stóð á árunum 2019 til 2021. Rannsóknin var síðan felld niður þar sem hin meintu brot voru ýmist talin fynd eða að mál þóttu ekki líkleg til sakfellingar.
Í pistli sínum í gærkvöld segir Jón að ekkert barn hafi verið beitt ofbeldi á Gauksstöðum en greinir frá því að fyrrverandi fósturdrengur hafi haft samband við sig árið 2019 og skýrt honum frá yfirvofandi hópmálsókn:
„Hann tjáði mér að honum hafi verið boðið að taka þátt í málsókn gegn okkur Lindu, þar sem nokkur þáverandi og fyrrverandi fósturbörn okkar höfðu talað sig saman um að hægt væri að fá skaðabætur úr kerfinu ef þau kæmu saman og höfðuðu mál gegn okkur. Hann neitaði þátttöku í þessu máli en vildi láta mig vita að það væri eitthvað í undirbúningi. Þarna hafði nýlega verið í umræðunni bætur sem ríkið greiddi þolendum vegna alvarlegra brota á vistarheimilum fyrir aldamót.“
Einnig gefur Jón í skyn að endurvakin umfjöllun um fósturheimilið tengist skipulagsdeilum varðandi áform hans um uppbyggingu ferðaþjónustu á Gauksstöðum og óvild í hans garð vegna þeirra áforma.
Lilja Margrét Olsen, réttargæslumaður 23 fyrrverandi fósturbarna Jóns, svarar pistli Jóns á Facebook og segir ásakanir Jóns vera fráleitar samsæriskenningar. Minnir hún Jón jafnframt á að trúnaðarskylda hans gagnvart fyrrverandi fósturbörnum hans sé enn í gildi. Lilja skrifar:
„Sem málsvari fjölda barna sem dvöldu á Gaukstöðum og réttargæslumaður 23 barna við skýrslutöku hjá lögreglu finn ég mig knúna til að svara ásökunum í þeirra garð sem birtast í færslunni. Ég get fullyrt að ekki í eitt skipti barst tal þeirra barna sem dvöldu á Gaukstöðum að bótum eða væntum bótum. Aldrei. Ég leyfi mér sömuleiðis að fullyrða að ekkert þeirra stígur fram vegna væntinga um slíkt. Á hinn bóginn kynnti ég fyrir þeim öllum rétt þeirra til að leggja fram miskabótakröfu við lögregla undir rannsókn málsins og fjölmörg þeirra höfnuðu því, af ástæðum sem verða ekki raktar hér.
Að brigsla þeim um að nýta löggæsluyfirvöld með því að leggja fram rangar sakargiftir á hendur ykkur, í þeim tilgangi að hagnast á því fjárhagslega er í senn ólögmætt og smekklaust með öllu.
Þá er ég að heyra í fyrsta sinn um áform þín í ferðaiðnaði við þennan lestur.
Samsæriskenningar um tengsl barna sem vistuð voru á heimilinu og ágreining þinn við samborgara þína í dag, eru fráleitar og eiga ekki við nein rök að styðjast.
Ég minni þig á að trúnaðarskylda þín gagnvart þeim börnum sem hjá þér dvöldu gildir enn!“
Töluverðar umræður eru um málið í Facebook-hópnum „Garðmenn og Garðurinn“ þar sem pistill Jóns birtist. Margir lýsa yfir stuðningi við hjónin á Gauksstöðum en aðrir segjast trúa ásökunum barnanna.
