Um viku eftir að tolla- og innflytjendaeftirlitið ICE skaut Renee Good til bana átti annað atvik sér stað í Minneapolis. Þar kom til átaka milli ICE og tveggja innflytjenda frá Venesúela sem endaði með því að ICE skaut annan innflytjendann, Julio Sosa-Celis, í fótinn. Nú eru tveir ICE-fulltrúar komnir í leyfi vegna málsins en bandaríska dómsmálaráðuneytið segir fulltrúana hafa borið ljúgvitni í málinu.
Heimavarnaráðuneytið sem fer með málefni ICE sagði í yfirlýsingu eftir atvikið að fulltrúar hefðu haft afskipti af Sosa-Celis við umferðarstöðvun. Sosa-Celis hafi þó reynt að flýja af vettvangi og síðar veitt mótspyrnu þegar fulltrúar ICE reyndu að handtaka hann. Hafi hann ráðist gegn fulltrúa ICE með skóflu eða kústskafti og fulltrúinn þá skotið af vopni sínu í sjálfsvörn.
Sosa-Celis lýsir atvikum með öðrum hætti. Hann hafi verið heima þegar hann fékk símtal frá frænda sínum, Alfredo Alejandro Aljorna. Aljorna var sendill fyrir DoorDash og veitti því eftirtekt að ICE væri að veita honum eftirför. Hann hafi því hringt heim til að vara fjölskyldu sína við. Aljorna hafi svo misst stjórn á bíl sínum vegna hálku og flúið hlaupandi frá ICE. Sosa-Celis hafi beðið frænda síns í dyragættinni og eftir að Aljorna var kominn inn hafi þeir lokað hurðinni og reynt að læsa þegar ICE-fulltrúi skaut Sosa-Celis í fótinn í gegnum útidyrnar. Hvorugur þeirra hafi verið vopnaður og hvorugur hafi veist að fulltrúum ICE.
Eftir fyrstu yfirlýsingu heimavarnaráðuneytisins fóru að renna tvær grímur á starfsmenn dómsmálaráðuneytisins eftir að upptökur af atvikinu voru skoðaðar. Það væri ekki annað að sjá en að lýsing innflytjendanna tveggja ætti við rök að styðjast, en það þýddi að ICE-fulltrúarnir hefðu ekki haft nokkuð tilefni til að grípa til vopna. Tveir ICE-fulltrúar sem áttu hlut að málinu höfðu þó tekið undir lýsingu heimavarnaráðuneytisins eftir að hafa unnið drengskapsheit. Fulltrúarnir hafa nú verið sendir í leyfi meðan mál þeirra er til rannsóknar en líklegt þykir að þeir hafi borgið ljúgvitni gegn betri vitund.
Sosa-Celis og frændi hans Aljorna höfðu báðir verið ákærðir fyrir brot gegn valdstjórninni en þær ákærur hafa nú verið felldar niður.
„Þetta var með öllu ónauðsynleg valdbeiting og fulltrúi ICE var að skálda um staðreyndir til að réttlæta það,“ segir lögmaður Aljorna í samtali við CNN. Miðillinn greinir frá því að mál innflytjendanna tveggja sé eitt dæmi af mörgum þar sem heimavarnaráðuneytið hafi hlaupið á sig með því að birta yfirlýsingar fljótlega eftir atvik máls, sem reynast svo við nánari skoðun ekki eiga við rök að styðjast.
