Vegna samstarfserfiðleika í sveitarstjórn og á skrifstofu sveitarfélagsins var kallaður til mannauðsráðgjafi á Vopnafirði. Daginn eftir að hann gerði hreppsráði Vopnafjarðarhrepps grein fyrir störfum sínum var gengið frá starfslokasamningi við sveitarstjórann, Valdimar O. Hermannsson, sem var samþykktur samhljóða á sveitarstjórnarfundi.

Morgunblaðið greinir frá þessu.

Tveir listar eru í sveitarstjórn Vopnafjarðarhrepps, B-listi Framsóknarflokks og óháðra er í meirihluta og H-listi, Vopnfjarðarlistinn, er í minnihluta.  Axel Erni Sveinbjörnssyni, oddvita B-listans, var falið að ganga frá starfslokasamningnum og í framhaldi af því sagði Axel af sér. Í samtali við Morgunblaðið sagði hann þá ákvörðun vera tekna af persónulegum ástæðum.

Ósætti hefur verið í sveitarstjórn Vopnafjarðar og hafa þrír sveitarstjórar látið af störfum á síðustu tveimur kjörtímabilum. Fjárhagsstaða sveitarfélagsins er undir eftirliti eftirlitsnefndar sveitarfélaga.

Samkvæmt frétt Morgunblaðsins er aðaldeiluefnið lenging á löndunarkanti en sveitarfélagið hefur skuldsett sig fyrir 400 milljónir vegna verkefnisins. Bitni það á öðrum verkefnum sem sitji á hakanum.