Þórdís Rögn Jónsdóttir er 28 ára iðnaðarverkfræðingur, annar eigandi og stofnandi fyrirtækisins sem bjó til og hannaði Bata-appið. Hún er nýjasti viðmælandi hlaðvarpsins Sterk saman.

Árið 2020 missti hún litla frænda sinn úr ofskömmtun stuttu fyrir tvítugsafmælið hans.

Þórdís nefndi að tilhugsunin um að frændi sinn hefði gengið út af meðferðarstöð með einungis blað í höndunum og takmörkuð plön um framhaldið hefði ekki verið góð.

„Það gerðist eitthvað innra með mér eftir að hann lést og ég áttaði mig á því að hans saga væri ekki einsdæmi.”

Í kjölfarið hóf hún fyrir alvöru að þróa forritið í samstarfi við SÁÁ. Seinna í ferlinu komu einnig Hlaðgerðarkot og Krýsuvík inn.

„Ég hef fengið að tala við yfir þrjú hundruð manns í þessari þróun. Fengið að fara inn á meðferðarstofnanir að tala við fólk og vinna appið í samræmi við þarfir þeirra sem myndu nota það.“

Það sem Þórdís sá og heyrði í samtölum sínum við fólk í meðferðum var að flestir áttu það sameiginlegt að upplifa skömm, fordóma og skilningsleysi frá samfélaginu.

Iðnaðarverkfræðingurinn í Þórdísi átti erfitt með að skilja hvernig meðferðargeirinn virkaði án þess að hafa nokkurn upphafspunkt eða núllpunkt og engan mælikvarða um langtíma árangur.

„Krýsuvík er eina meðferðarstöðin að minni vitund sem metur langtíma árangur sinna skjólstæðinga með símtölum til þess að fylgjast með stöðu fólks eftir að meðferð lýkur.”

Þórdís og hennar teymi hafa ákveðið að fara af stað með herferð sem heitir Hvað er bati fyrir þér?

„Við ákváðum að fá fólk í viðtöl í mynd sem mun svo rúlla á samfélagsmiðlum, allavega í febrúar. Ástæða nafnsins er að bati getur verið svo mismunandi fyrir hvern og einn, markmiðin eru svo misjöfn.”

Í grunninn er markmiðið að auka umræðu, minnka fordóma og sýna fólki að vímuefnavandi fer ekki í manngreiningarálit og snýst ekki um viljastyrk á neinn hátt. Hægt er að hlusta á þáttinn hér.