Maðurinn sem réðst að þingkonunni Ilhan Omar á íbúafundi í Minneapolis í vikunni er „skíthæll“ sem hefur um langa hríð haft brenglað hatur á sómölskum innflytjendum.

Þetta segir bróðir mannsins í samtali við The Independent.

Maðurinn, Anthony Kazmierczak, hljóp að Omar, hrópaði ókvæðisorðum að henni og sprautaði illa lyktandi vökva að þingkonunni þar sem hún stóð við ræðupúlt. Vökvinn var brúnleitur og óttuðust margir að um væri að ræða hættulegt efni. Síðar kom í ljós að um eplaedik var að ræða.

„Það kemur mér alls ekki á óvart að þetta hafi gerst,“ sagði bróðirinn sem vildi ekki láta nafns síns getið. Þeir hafa ekki verið í neinu sambandi og vandar hann bróður sínum ekki kveðjurnar.

„Því miður eru hann og móðir mín bæði öfgahægrimenn.“

Ihlan Omar fæddist í Sómalíu árið 1982 en fluttist með fjölskyldu sinni til Bandaríkjanna árið 1982. Bróðirinn er sannfærður um að árásin tengist uppruna Omar.

„Hann hefur hatað sómalíska samfélagið í líklega 20 ár,“ sagði bróðirinn, en Minnesota er heimkynni eins stærsta hóps íbúa af sómölskum uppruna í Bandaríkjunum.

„Það er ástæða fyrir því að ég tala ekki við hann… Hann er fullur af reiði, ég hef ekki hugmynd um hvaðan hún kemur. Hann hefur alltaf verið svona,“ sagði hann.

Öryggisverðir yfirbuguðu Kazmierczak og síðar var hann handtekinn af lögreglunni í Minneapolis. Hann var kærður fyrir líkamsárás af þriðju gráðu.

I am deeply disturbed to learn that Rep. Ilhan Omar was attacked at a town hall today. Regardless of how vehemently I disagree with her rhetoric – and I do – no elected official should face physical attacks. This is not who we are.pic.twitter.com/2kNUqcnAb8

— Rep. Nancy Mace (@RepNancyMace) January 28, 2026