Flugfélagið Nice Air, sem hugðist hefja sig til flugs í febrúar frá Akureyri til Kaupmannahafnar hefur hætt við fyrstu ferðina sem ráðgerð var 19. febrúar næstkomandi sem og heimferðina 22. febrúar. Frá þessu greinir Akureyri.net en farþegar, sem keypt höfðu miða, fengu tilkynningu um þetta fyrr í dag. Akureyri.net greinir frá.

Í tölvupóstinum bendir þó ekkert til þess að árar hafi verið lagðar í bát. Í skilaboðum til viðskiptavina kemur fram að undirbúa þurfi verkefni betur „áður en við getum tekið á móti farþegum um borð á ábyrgan hátt,“ eins og segir í póstinum.

Forstjóri fyrirtækisins, hinn þýski Martin Michael, boðaði óvænt til blaðamannafundar í desember þar sem greint var frá fyrirætlununum að endurreisa Nice air. Hið nýja félag var sagt fjármagnað af eigin fé, sem kæmi úr fjölskyldurekstrinum Whiteskarkgroup. Að sögn forstjórans hefur hann áratugareynslu af ferðaþjónustu og flugrekstri en viðurkenndi þó að hið fyrirhugaða rekstrarfyrirkomulag væri framandi.

Sagði hann mikilvægt að fara hægt af stað og hafði fullan skilning á efasemdaröddum eftir að flugfélag með sama nafni var rekið í þrot fyrir nokkrum árum.