Ragnar Þór Pétursson, kennari og fyrrverandi formaður Kennarasambands Íslands, segir grátlegt að menntamálin hafi nú lent „í hrömmunum á ráðherra sem virðist halda að besta meðalið séu lygar, ýkjur, svik og hótanir“.
Þetta kemur fram í grein hans hjá Vísi í dag.
„Í fyrstu fannst mér oggulítið sætt þegar reynsluboltar í kennaraliði landsins klöppuðu reiðum kollegum sínum á axlirnar og sögðu þeim að láta ekki hugfallast þótt nýi menntamálaráðherrann léti svona, best væri að tækla hann eins og baldinn nemanda.
Það runnu þó á mig tvær grímur þegar ráðherrann færðist bara í aukana og innan fárra daga (eiginlega bara einnar helgar) hafði hann látið hafa eftir sér svo mörg dæmi óheiðarleika og offors að mér var eiginlega öllum lokið. Ef Inga Sæland væri nemandi væri strax komið að foreldrafundi.“
Ragnar Þór segir Ingu ófært að koma sýn sinni á framfæri með öðru en lygum, ýkjum, svikum og hótunum. Þetta hafi orðið til þess að stór hópur foreldra, skólafólks og nemenda, sem annars hefði verið tilbúinn að bretta upp ermar í menntamálum, sé nú sundraður og sár.
Inga hafi farið með rangfærslur um stöðu Finna í PISA-könnunum, ýkt vanda kerfisins og drengja með því að fullyrða að kerfið sé ónýtt og að drengir séu upp til hópa vonlausir til framtíðar. Hún fullyrði að það sé leikur einn að taka aftur upp einkunnir í tölustöfum án þess að átta sig á því að nemendum er raðað í áfanga í framhaldsskóla á grundvelli bókstafseinkunna úr grunnskóla.
„Jafnvel þótt fólk fari út í lífið með lítið lestrarþol og stirðan upplestur bíða þess fjölmörg tækifæri til að láta til sín taka og verða sér og öðrum að gagni. Reynslan sýnir að það getur jafnvel orðið menntamálaráðherrar.“
Svik Ingu felist svo í tali hennar um að birta niðurstöður samræmdra mælinga opinberlega. Því hafi verið lofað við mótun Matsferils að þetta nýja kerfi yrði ekki misnotað með slíkum hætti. „Þau svik munu draga dilk á eftir sér“.
Hótanir Ingu séu svo það undarlegasta. Inga hafi talað um að vilja gera breytingar í sátt við menntasamfélagið en ef hún mæti mótstöðu muni hún ekki hika við að breyta námskrá í takt við þarfir barnanna.
„Hverjum dettur í hug að tala svona? Mér dettur reyndar einn í hug sem situr nú í hvítu húsi og ásælist bæði lönd og vegtyllur – en þar með er það upptalið. Engum ráðamanni í okkar heimshluta þætti sæmd af því að vaða fram með margvíslegan misskilning, rangfærslur og ýkjur og heimta síðan hollustu og uppklapp.“
Ragnar Þór bendir á að í nýju ráðuneyti Ingu séu allar skúffur fullar af alls konar rannsóknum, skýrslum og niðurstöðum. Mikið er vitað um stöðu og stefnu menntakerfisins. Til dæmis það að námsfúsustu börnin hafa um nokkra hríð valið annan málheim en íslensku til að svala forvitni sinni.
„Við eigum frábæra nemendur sem geta sagt þér allt um silicon og Saturn en kíma þegar minnst er á kísil og Satúrnus. Við vitum að fræðilegir textar eiga síður upp á pallborðið í íslensku samfélagi og skólum en frásagnir og skáldskapur. Vitsmunaleg áreynsla víkur líka of oft fyrir ofstjórn og utanbókarlærdómi.“
Á Íslandi hafi veikburða samstaða verið að myndast um næstu skref eftir langa þrautargöngu. Því sé það grátlegt að „menntakerfið skuli einmitt nú lenda í hrömmunum á ráðherra sem virðist halda að besta meðalið séu lygar, ýkjur, svik og hótanir.“
