Jessica Moretti, annar eigenda svissneska skíðabarsins Le Constellation í Crans-Montana, er sagður hafa flúið af vettvangi með peningakassa á milli handanna á meðan gestir staðarins börðust í örvæntingu fyrir lífi sínu.

40 manns, aðallega ungmenni, létust þegar eldur kom upp á staðnum á gamlárskvöld og þá slösuðust 119 til viðbótar, margir alvarlega.

Ítalska blaðið La Repubblica greinir frá því að eigendur staðarins, Moretti og eiginmaður hennar, Jacques, séu einnig grunuð um að hafa eytt sönnunargögnum eftir að eldurinn kom upp.

Þannig hefði Facebook og Instagram-reikningum barsins verið lokað nóttina sem eldurinn kom upp og Moretti og eiginmaður hennar einnig eytt aðgöngum sínum að samfélagsmiðlum.

Romain Jordan, lögmaður sem fer með mál fyrir hönd hluta hinna 116 slösuðu, segir að eldurinn hefði kviknað um klukkan 1:30 aðfaranótt nýársdags og heldur því fram að klúbburinn hefði lokað samfélagsmiðlareikningum sínum á milli klukkan 3 og 6:30 um morguninn.

Jafnframt var heimasíða staðarins tekin niður á meðan slökkvilið og viðbragðsaðilar reyndu að slökkva eldinn og bjarga fórnarlömbum. Hann sagði að lokuðu reikningarnir hefðu innihaldið myndbönd af troðfullum barnum þetta kvöld – og fyrri skemmtunum – og hélt því fram að öryggismál hefðu strax komið upp í huga stjórnenda þegar eldurinn kviknaði.

„Skjólstæðingar mínir vilja svör,“ sagði hann. „Þeir vilja að ábyrgðarkeðjan sem leiddi til þessa harmleiks verði dregin fram með skýrum hætti. Stjórnendur eru til rannsóknar, en bæjaryfirvöld verða einnig að sæta rannsókn.”

Moretti-hjónin, sem bæði eru franskir ríkisborgarar, hafa átt klúbbinn frá árinu 2015 og eru þau bæði til rannsóknar vegna málsins. Komið hefur fram að síðasta öryggisskoðun á staðnum fór fram árið 2019.