Mikel Arteta, stjóri Arsenal, viðurkennir að það sé alls ekki öruggt að hann verði áfram við stjórnvölin á næsta tímabili.

Arteta á 18 mánuði eftir af samningi sínum við Arsenal en hann hefur stýrt félaginu undanfarin sex ár.

Arsenal vann 1-0 sigur á Everton um helgina og er í fínni stöðu á toppi deildarinnar á Englandi.

Arteta veit það þó manna best að hann þarf að skila titlum svo hann fái nýjan samning hjá félaginu sem hann spilaði með sem leikmaður.

,,Já ég gæti haldið áfram en við lifum fyrir daginn í dag. Það er mikið sem á eftir að gerast á næstu mánuðum og ég þarf að vinna mér inn fyrir því að halda þessu starfi,“ sagði Arteta.

,,Ég hef alltaf sagt það að þú þarft stuðning frá stuðningsmönnum, stjórninni og eigendum. Ef þú getur ekki haldið áfram uppteknum hætti að vinna leiki þá geturðu ekki lifað af í þessu umhverfi.“