Fyrsta bók Marínar Magnúsardóttur sem kom út hjá Sölku í október sl er uppseld hjá bókaútgefanda. Hún ber heitið Hera og Gullbrá – sönn saga enda er hún byggð á sönnum atburðum. Myndirnar í bókinni gerir Sunneva Guðrún Þórðardóttir.

Saga Margrét er hrædd við hunda og verður því heldur hissa á fjölskyldu sinni sem ákveður að ættleiða labradorhundinn Heru. Fyrr en varir verða þær þó perluvinkonur enda er Hera svo góð við allt og alla. Í sumarbústaðarferð fundu þau pínulítinn gæsarunga sem neitaði að víkja frá þeim og fékk nafnið Gullbrá. Hera tók Gullbrá undir sinn verndarvæng og til varð sönn og hugljúf saga sem segir frá óvæntri og fallegri vináttu.

Marín er fædd og uppalinn á Hólmavík. Hún er viðskiptafræðingur að mennt með sérhæfingu í mannauðsstjórnun og markaðs- og almannatengslum. Hún situr í stjórnum fjölmargra fyrirtækja og er stjórnarformaður Exedra auk þess sem hún teku virkan þátt í nýsköpunarverkefnum og ýmsum góðgerðarverkefnum, á borð við Riddarar kærleikans. Marín er gift Andra Þór Guðmundssyni, saman eiga þau fimm börn og tvo labradorhunda.

Síðustu eintök af Heru og Gullbrá má vonandi finna í: Pennanum Eymundsson, Hagkaup, Nettó, Bónus, Blómabúðinni Blóm og Fiðrildi og Húsdýragarðinum.