Íþróttafréttakonan Christina Chambers og eiginmaður hennar, Johnny Rimes, fundust látin á heimili sínu á þriðjudaginn. Lögreglan telur að um manndráp og sjálfsvíg sé að ræða.

Áhyggjur vöknuðu þegar hjónin mættu ekki til messu að morgni og ákvað faðir Rimes í framhaldinu að kanna málið. Þegar hann bankaði á dyrnar kom 3ja ára sonur hjónanna til dyra og hleypti afa sínum inn sem kom þá að syni sínum og tengdardóttur látnum.

Nágranni hjónanna, Charles Maple, segist hafa fengið áfall þegar hann frétti af andláti hjónanna, en það hafi þó ekki komið honum á óvart. Maple segir að hjónin hafi flutt í hverfið fyrir sjö árum og virkað hamingjusöm í fyrstu. Eftir að sonur hjónanna kom í heiminn hafi þó eitthvað breyst.

„Ég bara upplifði að eitthvað væri ekki eins og það átti að vera,“ sagði Maple í samtali við People. Hann segir að hann hafi ekki upplifað að Chambers óttaðist um líf sitt og sjálfur óttaðist Maple ekki um öryggi barnsins. Engu að síður kom það honum ekki á óvart að sjá viðbragðsaðila við heimili hjónanna á þriðjudaginn.

„Ég var sleginn, en einhvern veginn, veit ekki hvers vegna, varð ég ekkert sérstaklega hissa.“

Lögreglan hefur ekki gefið upp hvort hjónanna er grunað um að hafa banað hinu.