Leikkonan Angelina Jolie gekkst undir tvöfalda brjóstnámsaðgerð árið 2013 eftir andlát móður sinnar, sem greindist með brjóstakrabbamein. Í viðtali við TIME France, sem kemur út á morgun, útskýrir Jolie hvers vegna hún sýnir nú heiminum niðurstöður tvöfaldrar brjóstnámsaðgerðar meira en áratug eftir að hún gekkst undir fyrirbyggjandi aðgerð árið 2013.
„Ég deili þessum örum með mörgum konum sem ég elska. Og ég er alltaf snortin þegar ég sé aðrar konur deila sínum. Ég vildi ganga til liðs við tímaritið, vitandi að TIME France myndi deila upplýsingum um brjóstheilsu, forvarnir og þekkingu á brjóstakrabbameini.“
Móðir Jolie, leikkonan Marcheline Bertrand, lést 56 ára að aldri árið 2007 eftir að hafa fengið krabbameinsgreiningu. Í skoðanagrein í New York Times frá maí 2013 sem hét „Mitt læknisfræðilega val“ sagði Jolie að læknar hefðu sagt henni að prófanir hefðu leitt í ljós að hún hefði „gallað gen“, BRCA1, sem jók verulega hættuna á brjóstakrabbameini.
„Ég vildi skrifa þetta til að segja öðrum konum að ákvörðunin um að gangast undir brjóstnám var ekki auðveld,“ skrifaði Jolie árið 2013. „En það er ákvörðun sem ég er mjög ánægð með að hafa tekið. Líkur mínar á að fá brjóstakrabbamein hafa lækkað úr 87 prósentum í undir 5 prósent. Ég get sagt börnunum mínum að þau þurfa ekki að óttast að þau muni missa mig vegna brjóstakrabbameins.“
Í mars 2015 sagði Jolie að hún hefði einnig látið fjarlægja eggjastokkana og eggjaleiðarana sem fyrirbyggjandi aðgerð gegn eggjastokkakrabbameini.
Í nýja viðtalinu hvetur Jolie til þess að BRCA skimun yrði aðgengileg öllum konum.
„Hver kona ætti alltaf að geta ákveðið sína eigin leið að heilrigði og haft þær upplýsingar sem hún þarf til að taka upplýstar ákvarðanir: erfðaprófanir og skimun ættu að vera aðgengileg og hagkvæm fyrir konur með skýra áhættuþætti eða verulega fjölskyldusögu,“ sagði Jolie við TIME France.
„Þegar ég deildi reynslu minni árið 2013 var það til að hvetja til upplýstrar ákvarðana,“ hélt hún áfram. „Ákvarðanir um heilbrigðismál verða að vera persónulegar og konur verða að hafa þær upplýsingar og stuðning sem þær þurfa til að taka þessar ákvarðanir. Aðgangur að skimun og umönnun ætti ekki að vera háður fjárhagslegum úrræðum eða búsetu.“
Jolie leikur í væntanlegri kvikmynd, Couture, í leikstjórn Alice Winocour, sem frumsýnd verður í Frakklandi í febrúar 2026. Í þessari „mjög persónulegu sögu“ leikur hún Maxine Walker, bandaríska kvikmyndagerðarkonu sem greinist með brjóstakrabbamein.
Jolie segir í viðtalinu að hún hafi„alltaf dáðst að verkum Alice“ og segir hana frábæran leikstjóra með einstaka nálgun á veikindum.
„Of oft fjalla kvikmyndir um baráttu kvenna, sérstaklega krabbamein, um endalok og sorg, sjaldan um lífið,“ sagði Jolie og bætti við að franski handritshöfundurinn og leikstjórinn hefði tekið á viðkvæmum viðfangsefnum Couture „af mikilli nærgætni“.
„Erfiðleikar, veikindi og sársauki eru hluti af tilveru okkar, en það sem skiptir máli er hvernig við tökumst á við þá. Móðir mín var veik í mörg ár. Eitt kvöldið, þegar hún var spurð út í krabbameinslyfjameðferðina sína, varð hún mjög tilfinningaþrungin og sagði mér að hún hefði frekar viljað tala um eitthvað annað; henni fannst eins og veikindin væru að verða öll hennar sjálfsmynd.“
„Mér finnst þessi mynd frábær því hún segir sögu sem fer langt út fyrir ferðalag veikrar manneskju: hún sýnir lífið. Það var þetta bjarta sjónarhorn sem snerti mig og fékk mig til að vilja leika þetta hlutverk,“ sagði Jolie.
Viðtalið í heild sinni, með myndum af örum Jolie, mun birtast í fyrsta tölublaði TIME France, sem verður fáanlegt 18. desember.
