Rob og Michele fundust í blóði sínu á heimili sínu í Los Angeles á sunnudag, en Nick var handtekinn nokkru síðar af lögreglunni í Los Angeles sem naut aðstoðar fulltrúa US Marshals, elstu alríkisstofnunar Bandaríkjanna. Myndir sem teknar voru á vettvangi sýna handtökuna.
Greint var frá því í gær að Rob, Michele og Nick hefðu sótt jólafögnuð á heimili Conon O‘Brien á laugardagskvöld. Þar lentu þeir feðgar í einhvers konar rifrildi og herma heimildir Daily Mail að rifrildið hafi verið það hávært að gestir urðu þess varir.
Rob og Michele eru sögð hafa yfirgefið gleðskapinn skömmu síðar og leikur grunur á að Nick hafi farið á eftir foreldrum sínum þessa örlagaríku nótt.
Hann er sagður hafa tékkað sig inn á The Pierside Santa Monica-hótelið klukkan fjögur aðfaranótt sunnudags. Segir Daily Mail frá því að blóð hafi fundist í herbergi hans.
Nick hefur barist við fíkn, geðræn veikindi og heimilisleysi á síðustu árum. Árið 2016, þegar hann var 22 ára, hafði hann farið í meðferð 17 sinnum.
Var það systir hans, Romy, sem kom að foreldrum sínum látnum eftir hádegi á sunnudag að staðartíma og segja bandarískir fjölmiðlar að hún hafi bent lögreglu á að skoða hvort Nick hefði haft eitthvað með morðin að gera.
