Sigmundur Davíð Gunnlaugsson, formaður Miðflokksins, hefur lagt fram á Alþingi frumvarp til breytinga á lögum um réttindi og skyldur starfsmanna ríkisins en samkvæmt frumvarpinu yrði lögbundinn eftirlaunaaldur ríkisstarfsmanna hækkaður úr 70 árum í 73.

Í greinargerð með frumvarpinu segir að það sé nú flutt í áttunda skipti en hafi ekki náð fram að ganga.

Segir enn fremur að frá setningu laganna hafi lífaldur Íslendinga hækkað auk þess sem almennt heilsufar þjóðarinnar hafi batnað þannig að nú haldi fólk góðri heilsu lengur. Sú breyting hafi verið gerð á lögum um almannatryggingar árið 2016 að nú sé hægt að hefja lífeyristöku á bilinu frá 65 ára til 80 ára aldurs. Breytingin gagnist ekki ríkisstarfsmönnum, hvort sem um sé að ræða skipaða embættismenn eða ráðna starfsmenn, því að báðum hópum sé gert að láta af störfum þegar 70 ára aldri sé náð, samkvæmt gildandi lögum.

Samkvæmt greinargerðinni er markmið frumvarpsins að þessum starfsmönnum og embættismönnum hjá ríkinu verði gert kleift að starfa hjá því til 73 ára aldurs standi hugur þeirra til þess en að sjálfsögðu geti þessir hópar látið af störfum sjötugir eftir gildistöku ákvæða frumvarpsins líkt og áður. Alkunna sé að mikill auður liggi í reynslu og þekkingu starfsmanna sem unnið hafi sem sérfræðingar og embættismenn um langa hríð. Það sé því bæði þeim og ríkinu til hagsbóta að almennir starfsmenn og embættismenn eigi kost á því að starfa lengur en til 70 ára aldurs ef þeir vilji. Dæmi séu um að embættismenn og aðrir ríkisstarfsmenn séu ráðnir sem verktakar eftir starfslok til að sinna störfum sem þeir sinntu áður. Það fyrirkomulag sé snúið og hvorki þeim né ríkinu til hagsbóta.

Nú þegar aldraðir geri ríkari kröfur en áður um fulla þátttöku í þjóðfélaginu lengur fram eftir aldri sé bæði rétt og skylt að gera þeim það kleift með því að hækka hámarksaldur þeirra sem vinna hjá ríkinu.