Maður að nafni Sveven sem býr í Berlín hefur verið dæmdur til fangelsisvistar fyrir að hafa ekki hemil á hundi í hans umsjá en hundurinn beit þrjár manneskjur í íbúahverfum í Berlín er maðurinn var að viðra hann. Í tveimur tilvikum var maðurinn með hundinn í of löngum taumi og í eitt skiptið gekk hundurinn laus.

Bild greinir frá.

Bitin voru alvarleg og einn brotaþolinn hefur þurft að ganga undir margar læknisaðgerðir til að fá bók meina sinna auk þess að þjást af ofsahræðslu við hunda eftir atvikið. Fyrir dómi lýsti 59 ára gömul kona því að hún hafi staðið fyrir utan lyftu er hún fann skyndilega óbærilegan sársauka í öðrum fótleggnum. Hundurinn hafði þá ráðist að henni án þess að hún yrði hans vör. Skömmu síðar sá hún bita úr eigin holdi liggja við fætur hennar. Um var að ræða bita úr fótleggnum.

Ákærði sagði fyrir dómi að honum fyndist þetta afar leitt og það hafi ekki verið ætlun hans að hundurinn biti fólk. Dómari sagði hins vegar að hann væri ábyrgur fyrir árásunum og honum hafi borið skylda til að hundurinn skaðaði ekki fólk. Það sem gerðist hafi verið fyrirsjáanlegt.

Var maðurinn dæmdur í tveggja ára óskilorðsbundið fangelsi.

Hundinn segist hann hafa verið með í fóstri fyrir fyrrverandi unnustu sína. Ljóst er að hann getur ekki sinnt hundinum á næstunni.