Frönsku forsetahjónin, Emmanuel og Brigitte Macron, hafa stefnt bandaríska áhrifavaldinum Candace Owen fyrir meiðyrði. Stefnan í málinu er komin í dreifingu í netheimum en þar eru ummæli áhrifavaldsins í garð forsetahjónanna rakin á 250 blaðsíðum.
Owens hefur haldið ýmsu fram um hjónin en hér eru nokkrar gölnustu fullyrðingar hennar teknar saman.
Candace Owens hefur lengi haldið því fram að Brigitte Macron sé trans kona. Hún hafi fæðst karlkyns en sé að villa á sér heimildir. Nafninu Brigitte sé stolið en við fæðingu hafi forsetafrúin fengið nafnið Jean-Michel Trogneux. Þessu til stuðnings hefur Owens rakið að fáar myndir séu til úr æsku Brigitte eða frá þeim tíma sem hún á að hafa gengið með börn sín þrjú. Forsetahjónin rekja í stefnunni að Jean-Michel sé vissulega til. Hann er eldri bróðir Brigitte. Eins séu vissulega til myndir úr æsku hennar, hún á fjölda systkina og þrjú börn.
Owens hafi séð myndir af Brigitte sem barn, fæðingartilkynningu sem birtist í dagblaði eftir að hún kom í heiminn, myndir úr brúðkaupi hennar og barnsföður hennar, en engu að síður haldi hún því enn fram að Brigitte sé karlmaður, nema síðar hafi hún haldið því fram að Brigitte sé í raun eldri bróðirinn, Jean-Michel, sem hafi stolið persónuau0ðkenni litlu systur sinnar. Helstu rökin fyrir þessu séu þau að fjölskyldusvipur er með systkinunum og breytti það engu þó að Owens hafi heyrt frá fólki sem hefur talað við Jean-Michel og séð nýlegar myndir af systkinunum saman.
Þetta er líklega það galnasta sem hefur komið frá Owens um forsetahjónin. Owens hefur rakið í myndböndum að frændi Brigitte sé líkur Emmanuel Macron í útliti. Þetta bendi til þess að forsetahjónin séu blóðskyld. Umræddur frændi er sonur eldri bróður Brigitte, Jean-Michel.
Owens sagði í þáttaröð sem hún gerði um forsetafrúnna:
„Ég veit að eftir standa margar spurningar. Er Brigitte Macron, forsetafrú Frakklands, líffræðilegur faðir Emmanuels Macron? Við höfum heyrt það oft. Hvar er hin raunverulega Brigitte Trongeux?“
Aðdáendur samsæriskenninga kannast líklega við verkefnið MK-Ultra. Samsæriskenning gekk lengi um að bandaríska leyniþjónustan CIA hefði á árum áður gert tilraunir á fólki. Tilraunin fólst í því að reyna að heilaþvo fólk, eða fá það til að segja sannleikann, með því að gefa þeim eiturlyf á borð við ofskynjunarlyfið LSD. Árið 1995 voru birt skjöl sem sýndu að þessar tilraunir áttu sér raunverulega stað.
Candace Owens telur að Emmanuel Macron sé afleiðing slíkra tilrauna. Vísar hún til þess að lítið sé til af opinberum upplýsingum um æsku forsetans og til þess að faðir hans var geðlæknir og móðir hans barnalæknir. Emmanuel hafi verið heilaþveginn af einhvers konar samtökum og svo handvalinn í embætti forseta.
Owens hefur haldið því fram að Brigitte hafi verið þátttakandi í tilraun sem fór fram í Stanford-háskóla árið 1971. Þar var háskólanemum skipt í hópa af föngum og fangavörðum og látnir dvelja í eftirlíkingu fangelsis í kjallara háskólans. Markmiðið var að skoða hvaða áhrif hlutverk og aðstæður hafa á hegðun fólks. Vísindamaðurinn sem stóð fyrir tilrauninni þurfti að grípa inn í aðstæður eftir að nemarnir í hlutverki varða fóru að beita „fangana“ yfirgengilegu harðræði.
Owens hefur ekki beint komið með sannfærandi rök fyrir þessari kenningu. Hún hefur nefnt að einn þátttakandinn hafi verið um 173 cm á hæð en Brigitte sé um 167 cm á hæð. Þekkt sé að fólk minnki með aldrinum.
Til að halda því fram að Brigitte sé karlmaður þurfti Owens einhvern veginn að útskýra börnin hennar þrjú. Ekkert mál, hugsaði áhrifavaldurinn. Hún hefur til dæmis haldið því fram að barnsfaðir hennar og fyrrum eiginmaður, André-Louis Auzière, hafi aldrei verið til. Áhrifavaldurinn hefur eins haldið því fram að Brigitte sé í raun faðir barna sinna og hafi átt þau með konu.
André-Louis lést árið 2019. Owens hefur haldið því fram að tímasetningin sé grunsamleg. Mögulega hafi andlátið verið sviðsett til að koma honum í felur svo hann gæti ekki afhjúpað sannleikann um forsetafrúnna. Mögulega var hann ráðinn af dögum til að þagga niður í honum.
Áhrifavaldurinn Charlie Kirk var skotinn til bana í september. Hann og Candace Owens voru vinir og er Owens sannfærð um að maðkur sé í mysunni hvað morðið varðar. Hefur hún haldið því fram að forsetahjónin hafi reynt að afvegaleiða rannsókn hennar á morðinu. Þessu til stuðnings hefur hún nefnt að einn ráðgjafi franska forsetans hafi mætt í hlaðvarp til BBC um málið um 8 dögum eftir að Kirk var myrtur.
Í stefnu segir að allar þessar ásakanir Owens séu úr lausu lofti gripnar. Þetta hafi henni ítrekað verið bent á. Hún hafi fengið fullt af gögnum sem afsanni samsæriskenningar en hún haldi þeim viljandi frá áhorfendum sínum enda sé markmiðið hennar að græða á auðtrúa fólki sem elskar samsæri. Áhrifavaldurinn sé ekki einu sinni sjálfum sér samkvæmur heldur sé sífellt að breyta og bæta galnar kenningar sínar um forsetahjónin. Eins reyni hún að flétta alls konar þekktar samsæriskenningar inn í þetta allt saman til að vekja enn meiri athygli.
„Þessar staðhæfingar eru augljóslega rangar og Owens vissi það þegar hún birti þær. Hún birti þær engu að síður. Ástæðan er augljós: tilgangurinn er ekki að eltast við sannleikann heldur að eltast við frægðina. […] Hún hefur byggt vörumerki sitt upp með ögrunum frekar en sannleika. Hún titlar sig sem sjálfstæðan rannsóknarblaðamann en birtir svo kerfisbundið falsfréttir í gervi heiðarlegra frétta. […] Efni hennar er ekki ætlað að upplýsa heldur að ögra upp og vekja athygli með æsifréttamennsku og samsæriskenningu.“
Candace Owens er ekki af baki dottin þó að þessi langa stefna hafi verið lögð fram í meiðyrðamáli gegn henni. Ef eitthvað er hefur hún bara bætt í. Nú heldur hún því fram að forsetahjónin hafi verið beinir þátttakendur í morðinu á Charlie Kirk og að þau hafi reynt að láta myrða Owens sjálfa.
