Maðurinn sem um ræðir heitir Rahmanullah Lakanwal og kom til Bandaríkjanna frá Afganistan fyrir fjórum árum.
Í frétt New York Post kemur fram að Lakanwal hafi starfað í sérhæfðri hryðjuverkasveit í Afganistan sem vann meðal annars með og naut stuðnings CIA.
Þegar Afganistan féll undir stjórn Talíbana árið 2021 var Lakanwal hleypt inn í landið undir hinni svokölluðu Operation Allies Welcome-áætlun Biden-stjórnarinnar. Var markmiðið að hjálpa þeim Afgönum sem börðust gegn Talibönum að flýja land eftir brottför Bandaríkjahers frá landinu.
Lakanwal var búsettur í rólegu hverfi í Bellingham í Washington-ríki og fékk hann, að sögn New York Post, verktakasamning hjá Amazon við komuna til Bandaríkjanna.
John Ratcliffe, forstjóri CIA, var ómyrkur í máli í samtali við bandaríska fjölmiðla í gær og sagði að Lakanwal – eins og svo margir aðrir – hefðu aldrei átt að fá að dvalarleyfi í Bandaríkjunum.
„Borgarar okkar og þjónar ríkisins eiga miklu betra skilið en að verða fyrir afleiðingum af stórfelldum mistökum ríkisstjórnar Biden. Guð blessi hugrökku hermennina okkar,“ sagði hann.
Undir þetta tekur Shawn VanDiver, stofnandi og forseti #AfghanEvac, samtaka bandarískra hermanna sem aðstoða afganska bandamenn við að setjast að í Bandaríkjunum.
„Hann sveik fjölskyldu sína. Hann sveik hvern einasta Bandaríkjamann sem hjálpaði honum að komast hingað.“
Eins og greint hefur verið hefur heimavarnarráðuneyti Bandaríkjanna stöðvað tímabundið allar innflytjendabeiðnir afganskra ríkisborgara á meðan öryggisferlar verða endurskoðaðir.
Samkvæmt hátt settum bandarískum embættismanni, sem ræddi við CNN, hafði CIA rannsakað Lakanwal og hafði hann farið í gegnum öryggisathuganir hjá Þjóðaröryggismiðstöð Bandaríkjanna gegn hryðjuverkum þar sem ekkert athugavert kom í ljós.
Æskuvinur Lakanwals sagði við New York Times að hann hefði glímt við andleg veikindi vegna þess sem hann hafði séð í Afganistan. Hann hafi séð látið og illa slasað fólk og hann einfaldlega ekki höndlað það.
